Ni 1,003 chhung zet Champions League an khelh tawh loh hnuah, Manchester United chuan Ningani zan hian he inelna lianah hian kir lehna match an khel dawn ta a. An hmachhawn tur erawh Conference League lama hmuh awm tawk lek nia ngaih, kum 2017-a din chauh leh Baku aṭanga fan 300 chauh rawn hruai thei Azerbaijani club Sabah FK an ni.

Sabah FK an mikhual hnu hian United hmachhawn tur chu a khirh chho hle dawn a. Old Trafford-ah Bayern Munich, Roma leh RB Leipzig te an lo mikhual dawn a, khualmual lamah Atletico Madrid, Como, Sporting CP leh Villarreal te an tlawh dawn bawk a ni. United hian knockout stage luh ngei an inbeisei a, a ṭha berah chuan top eight-a awm a, an chetsual ber pawhin top 24-a awma play-off round paltlang an tum ang. Carrick pawhin Nilaini khan beiseina sang tak an nei tih a thup lo hle.

Ballon d'Or chawimawina dawng thei tura chhawpchhuah (nominee) zinga tel Bruno Fernandes-a'n kum ruk leh a chanve United-a a awm chhungin Champions League knockout tie vawi khat chiah a la khel thei hi thil mak tak a ni a. Hemi chungchang Carrick-a an zawh chuan, Fernandes leh player langsar dangte chelh theih nan squad ṭha tak an neih thu leh hlawhtlinna chang thei tura inpeih an nih thu a sawi chhuak a ni.

Carrick hian Champions League-in hmingṭhatna leh zahawmna a thlen theih zia chu a hre chiang hle. Kum 2008 khan United tan player niin he nomawi hi a lo chawi tawh a, kum 2011 final-ah pawh khan a inlan bawk. Hun rei tak he inelna an khelh loh hnu hian a hlutzia a langsar zual tih Carrick chuan a sawi a ni.

"He inelna hi a danglam bik em em a, kan za vaiin kan khelh chakna hmun a ni. I tel loh hunah a hlutzia i hrechhuak ṭhin a, i awm lai erawh chuan theihna zawng zawng hman ṭangkai i tum tur a ni," tiin Carrick chuan a sawi.

"Heng kum liam ta chhung khan he inelnaah hian zan chhinchhiah tlak leh ropui tak tak kan lo hmu tawh ṭhin a. Kan awmna tur dik tak a ni a, kir leh ngei kan duh ṭhin bawk. Khawvela player ṭha ber ber leh team chungnung ber berte cho theihna hmun ṭha ber a ni. Hun rei tak chhung he football club hian khawvela ṭha berte chu a lo cho tawh ṭhin a, ṭha ber nih pawh a lo hlawhchhuak tawh ṭhin a ni. Heta awm theih nan leh cham reng theih nan hian thil namai loh thawh a ngai a. Kum engemaw zat kan hmaih hnuah kan kir leh ta a, hei hian awmzia thuk tak a nei a ni. Kum tin kan awmna tur hmun a ni," a ti bawk.

United hian season an ṭan fuh tawk loh avangin kumin May thlaa Madrid-a final neih turah champion tura rinkai berte zingah an tel lo mai thei, mahse Carrick chuan engmah sawi lawk theih a nih loh thu a sawi a:

"'Hemi chin kan thlen chuan a hlawhtling a, kan thlen loh chuan kan hlawhchham' tih ang zawngin ka thlir lo. Kan hmaa chona thar awm hi team pum anga kan hmachhawn a ngai a ni. He inelnaah hian thil ṭha tak tak ti thei leh thui tak kal thei kan ni tih ka hria a, chumi hun a thlen meuh chuan engpawh a thleng thei. Beiseina ka la tihtawp phal lo," tiin a sawi.

Carrick hian manager anga Champions League a hmachhawn vawi hnihna a ni dawn a. A ṭhianpa Ole Gunnar Solskjaer ban a nih hnu khan November 2021-ah El Madrigal-ah Villarreal chu 2-0 in a lo hneh tawh a ni. Player a nih laiin match 70 ngawt a khel a, kum 2008-a Moscow-a Chelsea laka penalty shootout-a goal a khung kha a hun ropui ber a ni.

"Footballer ka nih chhunga ka rilru khawih ber leh nuam ka tih ber chu Champions League nomawi chawi kha a ni chiang mai. Khang hun kha theihnghilh a har a, vawi khat tal chu kha boruak kha tawn leh ka chak a ni," tiin a sawi zui bawk.