Kar thara Old Trafford-a Champions League a lo kir leh hma hian, Manchester United chuan inelnaa an player chhawr theih tur 25 awmna squad list chu UEFA hnenah an thehlut fel ta a. He squad list tarlanah hian player pawimawh Kobbie Mainoo leh Leny Yoro te hming a lang ve lo va, chu chuan ngaihven a hlawh zui hle a ni.

Mahse hetianga an hming a tel ve loh chung hian, he European tournament-ah hian Mainoo leh Yoro te pahnih hi Manchester United tan an la inlan thei dawn tho tih hriat a ni.

Tun season-a Champions League khel tur club zawng zawngte chuan Nilaini ral hma khan an 'A list' chu UEFA hnenah an thehlut vek tur a ni a. He list hi league phase chhung atan chuan tihdanglam theih miah lohvin a nghet hmak a; amaherawhchu, knockout stage lut thei club-te chuan league phase a zawh hnuah player pathum (3) thleng an thlak danglam theihna hun remchang an nei leh dawn a ni.

United hian phal zat tlukpui player 25 chu squad-ah hian an thlang kim thlap a, he squad-ah hian Mainoo leh defender Leny Yoro te an lang lo chu mak tih a hlawh hman hle a nih kha.

Mahse an pahnih hian United tan Champions League chu an la khel dawn chiang a, match khelh dawn apianga UEFA hnena thehluh ṭhin 'B list'-ah an hming hi ziah luh a ni dawn zawk a ni.

UEFA dan tarlan dan chuan, player chu January ni 1, 2005 emaw a hnu lama piang an nih a, kum 15 an tlin aṭanga club tana a zawnin kum hnih (loan-a an chhuah telin kum thum) chhung inlan thei tura club-a awm tawh an nih chuan, 'B list'-ah hian an hming a dah theih a ni. Mainoo leh Yoro te hi hetiang kum leh dan phak an nih avangin 'A list'-a hmun luah kher lovin 'B list'-ah an telh thei a, hei hian United chu player dang tan hmunawl a siamsak theih phah a ni.

Hetih lai hian academy rawlthar langsar Ayden Heaven leh kumin nipuia lak thar Tynan Thompson te erawh 'A list'-ah hian an dah thung a. Anni pahnih hi 'B list'-a tel theih nana club-a hun an la hman tlem avangin, inelna an khelh ve theih nan 'A list' aṭang khera ziah luh an ngai a ni.