Manchester United midfielder hlui Paul Scholes chuan thla eng emaw zat liam ta chhung khan Old Trafford squad chungchangah sawiselna a nei nasa hle a. Player 12 ngawt a lo sawisel tawh zingah, veteran midfielder Casemiro chiahin Old Trafford hi a la chhuahsan a ni.
He England midfielder hlui hi Michael Carrick-a naute laka a ngaihdan tlang taka sawichhuak ṭhin mi a ni a, player-te nungchang leh theihna chu a duhkhawp loh thu a sawi zing hle. Kumin nipui chhung khan United hian an squad thuam chak nan midfielder pathum leh goalkeeper pakhat an lalut a, mamawh tawh loh player ṭhenkhat an chhuahtir bawk a ni. Nipui transfer inhawng hma daiha chhuah tur thu puangtu Casemiro chiah hi tun hnaia Scholes-a'n a sawisel zinga club chhuahsan awmchhun a la ni.
Premier League season bulṭanna match-a Hull City laka 2-0 a an tlawm hnu khan, an captain Bruno Fernandes chuan a thiante khelh dan a sawisel a. TNT Sports hnenah Fernandes chuan, "Season liam taa kan tihsual bawk kha kan ti nawn leh a, khualmuala kan khelh apiangin ball kan hloh hnem lutuk ṭhin. Minute 20 chhung khan goalkeeper kha ball khawih hnem ber a ni hial. Kan nawr (press) na zawk a, kan ṭang zual a ngai a, set-piece aṭanga goal kan chhuah loh nan kan insiamrem a ngai a ni," tiin a sawi a.
He thusawi chungchangah hian Midnite sponsor 'The Good, The Bad & The Football'-ah Scholes chuan Bruno chu midang sawisel hmain a mah a inbihchian hmasak a ṭha zawk thu a sawi ve thung. Kum 51 mi Scholes chuan, "Khatianga i khelh ve tho hnuah kha chuan, ka ngaihdanin ngawih hmak kha a ṭha zawk, a chhan chu a mah pawh kha a khel ṭha bik der si lo," a ti. Midfield chungchang sawi belhin, "Player lakluh kawngah midfield laili ka thlir khan season liam ta aiin a ṭha chuang lo. Player thar i lakluh chuan hma i sawn a ngai a, mahse Inrinni kha chuan Kobbie Mainoo leh Casemiro inkawp ai pawhin a ṭha chuang lo," tiin a sawi zui bawk.
January thlaa Manchester derby-a an chak hnu khan defender Lisandro Martinez pawhin podcast-a an lo sawichhiat tawhna chungchangah Scholes chu hmaichhana inbia tura a cho thu a lo sawi tawh a. United player hlui Nicky Butt-a'n Martinez-a tawi zia sawiin Erling Haaland-a'n a chawi kang nawlh thei ang tia a fiamthu chu he Argentine defender hian a haw hle a ni. Martinez chuan, "A duh duh a sawi thei alawm. Ka hnenah sawi a duh a nih chuan ka inah pawh a lo kal thei ang, ka ngai pawimawh lo," a ti a. Scholes chuan Martinez hi che ṭha chhunzawm zel tura hrilhin, match khata chet ṭhat ringawt tawk loh thu leh title la thei tur khawpa a khelh ṭhat chhunzawm a ngaih thu a vawrh chhuak ve leh bawk.
Hull laka an tlawm hnuah Luke Shaw-a'n kaisang thar Hull City mual tlawh tur khan an inpuahchah ṭha tawk lo tia a sawi chu Scholes chuan a ngaithei lo hle a. Carrick chuan he defender hi a pisaa ko lut ngei tur a nih thu sawiin, "Luke Shaw hian thil a sawi ziah mai. Khatiang sawi kha chu i coach leh manager-te zah lohna a ni a, Thawhṭanni zingah chuan ko lutin a awmzia i zawt ngei tur a ni," a ti.
Season liam taa Marcus Rashford-a'n loan-a Barcelona a zawm lai pawh khan Scholes hian nasa takin a sawisel a. Rashford hian La Liga leh Supercopa nomawi la mah se, Scholes chuan, "A nungchang avang hian ka lawmpui thei thlawt lo. United chhuahsan a duh avanga a awmdan kha a zahthlak hle a, team a phatsan a ni. Barcelona-ah pawh a tlai a, hetiang nungchang hi chu an dawh rei lo tawp ang. Khawvela player ṭha berte zinga mi ni thei khawpa thiamna nei mah se, chutiang rilru puitling chu a nei ngai dawn lo a ni," a ti bawk.
The Times nena an inkawmnaah Scholes chuan Harry Maguire, Luke Shaw leh Casemiro te chu Premier League inelna sang tak tuar thei turin an taksa a chak tawk tawh loh thu a sawi a. "Player ropui tak an lo ni tawh ṭhin, mahse an taksa a chak tawh lo a, an tlan chak tawh hek lo. Premier League-a player dang zawng zawng chu khawl ang maia chak an nih laiin, United hian hetiang hmachhawn thei lo player pahnih khat an la kawl tlat a ni," tiin a sawisel zui bawk a ni.
