Manchester United boss hlui David Moyes chuan Pathianni hian Premier League-ah a club hlui chu Everton mualah a lo mikhual dawn a. He inkhel hmachhawn a nih hma hian, Moyes-a hnuaia Everton leh Alex Ferguson-a hnuaia United tana lo khel tawh forward Louis Saha chuan Old Trafford-a Moyes-a a hlawhchham chhan a sawichhuak a ni.

Saha chuan Manchester United manager nihna chu Moyes-a tan a la hma lutuk a, chu mai bakah Sir Alex Ferguson-a'n a chhuahsan hnua superstar squad enkawl nan a zia a khauh lutuk niin a sawi.

Everton-a a hun hmasa zawkah khan Moyes hian Toffees chu kum 2005 khan palina (fourth place) a nihpui a, top-eight ah vawi kua lai thlenpuiin, FA Cup final a thlenpui bakah hnehna vawi 218 a chanpui bawk a nih kha. LMA Manager of the Year lawmman vawi thum ngawt lo dawng tawh Moyes hi kum 2013 khan, Old Trafford-a kum 26 chhung nomawi tam tak la tawh Ferguson-a'n a chawlhsan hnuah a thlaktu atan ruat a ni.

Mahse Moyes-a'n beisei a pha ta lo. Community Shield nomawi la ve mah se, thla 10 chauh a enkawl hnuah ban a ni a, United chu Premier League-ah pasarihna (seventh) an nihpui a, kum 1995 hnua a vawikhat nan Champions League an khel thei ta lo a ni.

Hemi hnu hian Moyes hi a rawn tho chhuak leh a, West Ham United chu Conference League nomawi a chawipui hial a. Tunah hian Everton enkawl lehin, Pathianni hian Michael Carrick-a naute chu Goodison Park-ah an lo hmachhawn dawn a ni.

United leh Everton tana lo khel tawh Saha chuan All Out Football podcast 'In The Mixer'-ah heti hian a sawi: "Manchester United-a a kal kha a tan a hma mah mahin ka hria. A chhan chu Sir Alex Ferguson-a'n a chhuahsan khan club kha a nghing hle a ni.

"Giggsy [Ryan Giggs] ang te leh ram pawn player lian tak tak te enkawl tur kha chuan, Everton-a hetiang dinhmun nei player a lo neih tlem ṭhin ngaihtuah khan, he hna hi a tan a sang mah mah a ni.

"A chang chuan thil phut a sang hle ṭhin. Rilru zau tak put a, thil tlem thlahdul deuh zawk thiam a ngai a. Chu chu David Moyes-a'n a tih nghal theih loh chu a ni a, a harsa hle a ni," tiin a sawi.

Saha hi Ferguson-a hnuaiah United tan kum li leh a chanve a awm chhungin Premier League title vawi hnih a la a, match 124 inlanin goal 42 a khung hman a, hemi hnu hian Everton a zawm a ni.

Saha chuan sawi belhin, "Moyes hi Sir Alex Ferguson nena inanna tam tak nei niin ka hria. Football a ngainat em em dan te, a phur em em dan leh player tinte puih a duh danah an inang hle.

"Mahse a ruahmanna (plan) chhungah i inrem thlap a ngai a. Hei hi danglamna chu a ni mai thei. Alex Ferguson erawh chuan i theihna kha a ring tawk zawk a. Club mize inthlauhna pawh a ni tel bawk.

"Moyes-a player neih ṭhin te khan system lam ngaih pawimawh zualtir in, a duh anga an inrem leh an inven theih nan a nawr zual a ni maithei.

"Chuvang chuan keipawh tlem chuan ka insiamrem ve a ngai niin ka hria. Mahse Moyes hi mi tlang leh mi dik tak a ni a. A ngainat che chuan a ngaina che a, a duh loh che chuan a hrilh tlang mai che a ni," tiin a sawi bawk.