Premier League match-a Pathiannia Hill Dickinson Stadium-a Everton luhchhuah tur Manchester United chuan hliam vanga harsatna tawk player eng emaw zat an la nei chhunzawm zel a. Ipswich Town laka 5-2 a hnehna ropui tak an chan hnuah, Michael Carrick-a naute hian a zawnin hnehna vawi hnih lak tumin Merseyside an pan dawn a ni.

United hian point thum an hmu tawh a, result ṭha dang hmuh belh leh ngei an tum laiin Carrick hian chhawr theih a neih chunte a hman ṭangkai a ngai dawn thung. Kumin nipuia an lakluh Carlos Baleba chuan a debut siam turin a la nghah rih a ngai dawn a, pre-season laia a kerek a tihhliam aṭangin a la dam chiang lo a ni.

Thla hmasa khan Baleba chungchang sawiin Carrick chuan, "A kerekin harsatna tlem a nei a. Kar hnih vel emaw kar thum vel emaw a la ngai maithei, kan la thlir ang chu. Hliam pui tham erawh a ni lo a, a rawn kir leh theih hun chu kan nghakhlel hle a ni," tiin a lo sawi tawh a ni.

World Cup laia khup hliam na tak tuar midfielder Manuel Ugarte pawh a la chawl rei dawn a. Zai a nih hnuah pre-season pawh a hmaih vek a, engtikah nge khelmual a rah leh theih ang tih hriat theih a la ni lo. Defender Matthijs de Ligt pawh November thla liam ta aṭanga a hnungzang na vangin a la inlan thei lo bawk. He defender hi training zawm tawh mah se, United hian hmanhmawh taka khelmuala luhtir nghal an tum lo thung a ni.

Goalkeeper Tom Heaton pawh pre-season-a a hamstring hliam vangin a la chawl a, engtikah nge a rawn kir theih dawn tih a la chiang lo. Chu bakah training laia a thahrui ti hliam Amad pawh a dam hun tur chian theih a la ni lo bawk.

Chutih rualin, tlarhnung player Luke Shaw leh attacking midfielder Mason Mount te erawh an rawn inlan theih a beiseiawm thung. Mount hian August 8-a pre-season friendly-a PSG an hmachhawn ṭum khan hliam tenau a tuar a, hemi hnu hian matchday squad-ah a la inlan leh lo hrim hrim a ni. Ipswich an hneh ṭum khan Shaw pawh fitness buaina vangin lakchhuah ni mah se, Everton hmachhawn tur hian a inpeih leh hman tura beisei a ni.

Ke hliam nei Mount-a'n training a zawm leh tawh chungchangah Carrick chuan, "Mase hi team zingah a rawn tel leh tawh a, chu chu thil lawmawm tak a ni. Tun kar khan training a nei tawh a, kan tan chuan thil phurawm tak a ni," tiin a sawi.

David Moyes-a enkawl Everton khualmuala an hmachhawn tur chungchangah Carrick chuan fimkhur a ṭul zia sawiin, "Everton mual kan pan ṭum apiang hian inkhel a khirh em em ziah a ni.

"Table-ah eng dinhmunah pawh ding se, an hmachhawn hi a harsa ṭhin reng a. David hi manager ṭha tak a ni a. Player theihna nei ṭha leh attacking player hlauhawm tak tak an nei bawk. Inkhel harsa ber tur hmachhawn tura kan inpuahchah a ngai a ni," tiin a sawi bawk.