Manchester United-in Champions League match-a Sabah an hmachhawn hmain, an left-back rinrawl Luke Shaw chu Everton laka cramp a neih avangin chawlh hahdamna hun pek a ni a, squad-ah a inlan lo. Manager Michael Carrick chuan Shaw-a hmunruak luah tur hian Patrick Dorgu chu left-back-ah a dah a, heti hian he Dane player hian left winger a nihna chu kalsanin tlarhnung lam a vawng ta a ni.

Kar liam taa press conference an neih ṭum khan, transfer deadline-ah United-in player thar an la thei lo chungchang Carrick-a'n a sawifiahnaah, Dorgu hi Shaw-a chhawk thei tur a nih thu a lo sawi tawh a. Sabah laka Champions League inkhel hi Dorgu tan chuan he position-a a tlak zia pholanna hunṭha a ni a, he fiahna hi hlawhtling takin a paltlang ta a ni.

Sabah laka United 4-0 a an chak ṭum hian Dorgu hi a khel ṭha hle a, UEFA Man of the Match atan hial thlan a ni. He Danish rawlthar hian an goal hmasa ber atana assist a neih bakah chance vawi hnih lai a siam a, pass vawi 38 a pek zinga 37 zet chu a ṭhiante hnenah a thleng dik bawk a ni.

MUTV-a a inlan ṭumin, striker hlui Dion Dublin chuan Dorgu-a chet dan chungchang a sawi a, Lecce player hlui hian a mawhphurhna a hlen ṭha hle niin a ngai. A tirah chuan Dorgu-a'n UEFA Man of the Match lawmman a dawng tih Dublin hian a hre mai lo va, mual chhungah a langsar vut lo chungin a hna erawh a thawk ṭha hle niin a ngai zawk a ni.

Dublin chuan sawiin, "A che zangkhai hle a. Tlarhnung venhim kawngah a tih tur a hriat rualin hmalam a nawr bawk a, ball a vawng ṭha em em bawk. Inkhelh hi awlsam taka i khelh hian midangte hmuh zual i hlawh lo ṭhin a, langsar nih vak pawh a ngai chuang lo. Inkhelh chhung zawnga tuma'n an hmuh lem loh che a, i hna i lo hlen fel der a nih chuan i che ṭha tawk tihna a ni a, Dorgu hian zanin chu a hna a thawk ṭha hle a ni," a ti.

Dublin chuan sawi zuiin, "A tlarhnung venhim theihna lam a ṭha chho hle a, Michael Carrick-a'n a hnenah, 'Ngai thla rawh, hmalam i pan thiam zia kan hria. Box chhungah ball luh loh nan dang la, dinglam winger kha nuam takin khosa tir reng reng suh,' a tih ngei ka ring," tiin a sawi a. Left-back-ah hian Dorgu hi chhawr zui zel tlak a nih leh nih loh an zawh chuan, "Chiang lutuk tlat," tiin Dublin chuan a chhang a ni.

Inkhelh zawhah Dorgu pawhin TNT Sports a kawmnaah United-in point thum pawimawh tak an hmuh theih nana a ṭanpui thei chu a lawm thu a sawi a.

Dorgu chuan, "Ka inkhelh danah ka hlim hle a, team-in point thum kan hmu a, Champions League-ah bul kan ṭan ṭha bawk a ka lawm hle a ni. Match liam ta tlemteah khan goal kan chhuah hnem em em a, chuvang chuan kar tawpa derby kan khelh hmain inrintawkna thar min pe a, a ṭha takzet a ni," tiin a sawi chhuak a ni.