Pathiannia Everton laka Manchester United 2-2 a an inhnehtawk hnuah, United captain hlui Gary Neville chuan head coach Michael Carrick chu Erik ten Hag leh Ruben Amorim te ang bawka tihsual lian tak ti nawnah a puh a, hetiang thil hi a thlen nawn a thiang tawh lo tih a sawi.
First-half ah goal lut a awm loh hnuin, second-half ṭan aṭanga minute hnih chauh a liam tihin Carrick-a naute hian hma an hruai a. Mual dinglam sir aṭanga ball la chhoin Bryan Mbeumo chuan Jordan Pickford-a veilamah chiang takin a pet lut a ni. United-in inkhel an thunun viau tura ngaih a nih laiin, Everton chuan minute 83-naah Tyrique George-a goal mawi tak hmangin an siphurh an rawn sut a. Mahse minute nga hnu lekah Benjamin Sesko chuan United tan hmahruaina goal a rawn tauh lut leh a ni.
Chutih laiin, stoppage-time tawp lamah Hill Dickinson Stadium chu a phu mur mur a, Ainsley Maitland-Niles chuan hla tak aṭanga kawh zetin goal mawi lutuk a rawn khung takah chuan point insem zuiin, United chuan inhnehtawkin lungawilohna nen hun an khar ta a ni.
Everton goal hnih khungte hi a mawi em em ve ve a, mahse United lam thlirin Gary Neville chuan heng goal-te hi pumpelh theih ngei a nih a ring tlat thung. United captain hlui hian minute nga chauh khelh tur a awm tawh laia full-back pahnih (Luke Shaw leh Diogo Dalot) Carrick-a'n a la chhuak kher kha a hrethiam thei lo a, match thum khelhah goal ruk ngawt an chhuah tawh avangin goal an chhuah hnem lutuk hian nakin thlengin a la nghawng chhe dawn nia a hriat thu a sawi bawk.
Gary Neville Podcast-a a ṭawngchhuahnaah Neville chuan, "Team dangte hian United lakah hian point hmuh theihna chance an nei tih an hria a ni. An inthlahdah hretin ka hria a, an goal hmasa ber luh hnu pawh khan ka lo sawi tawh a, Everton-in an rawn sut hma khan inkhel titawp thei khawpa tualthahna rilru (killer instinct) an nei tawk lo a ni. First-half ah Everton kha an che ṭha lo em em a, United kha an khel ṭha zawk daih a, mahse 1-0 a hma an hruai aṭang khan Everton kha inkhelah an ko lut leh a ni. Hetianga goal chhuah awlsam lutuk hi a bo mai dawn lo tih ka hlau a ni," a ti.
Neville chuan sawi zawmin, "Minute nga chauh khelh tur a awm tawh laia engvangin nge Luke Shaw an lakchhuah ka hre lo - a inhliam loh ngei ka beisei. Dalot pawh engvanga la chhuak nge an nih ka hre lo bawk. Sawi dik tak chuan Ruben Amorim leh Erik ten Hag te pawh khan an tlarhnung mi pali (back four) hi an thlak kual nasa ṭhin em em a ni. Back four hi thlak kual reng tur a ni lo. Riccardo Calafiori aiah Piero Hincapie luhtir tur i nei a nih chuan a zia mai thei, mahse United chuan Shaw, Dalot, Maguire leh Lisandro Martinez te bak tlarhnungah player dang rintlak lutuk an nei lo. Chuvangin 1-0 emaw 2-1 a hma i hruai laia i back four thlak kual ngawt hi a thiang lo hrim hrim a ni," tiin Carrick-a thutlukna chu a sawisel hle.
Premier League match thum an khelh tawhah United hian point li chauh an la hlawhchhuak a. Season thar bul an ṭan match-ah Hull City lakah 2-0 a an tlawm hnuah kar liam ta khan Ipswich Town chu 5-2 in an lo hneh tawh thung a ni.
He inkhelh zawha a thutlukna leh an tlarhnung dinhmun chungchangah Carrick pawhin an harsatna chu pha lovin, "Hei hi kan haider thei lo a ni. Match-ahte kan chak theih nan goal kan chhuah tlem a ngai a, chu chu kan enchiang ang a, kan inzir zel dawn a ni. Team angin siamṭhat tur kan nei a, khingpui lam aṭangin ball tha tak tak vawi hnih pet a ni a, a chang chuan goal kilah a thlawk lut a, a tam zawkah erawh a lut bik ngai lo," tiin a sawi ve bawk.
United hian Ningani zan hian Champions League lamah kir lehin Azerbaijan club Sabah an hmachhawn dawn a, chumi hnu Pathianniah chuan Old Trafford-ah an hmelma Manchester City an lo mikhual dawn a ni.
