Viaplay hnena a sawinaah Manchester United defender Diogo Dalot chuan rinhlelh miah lovin Benjamin Sesko chu Old Trafford-a United first-team squad zinga player tlan chak ber a nih thu a sawi chhuak.

Mahse, 2026-27 Premier League campaign match hmasa pahnih aṭanga FotMob data lakkhawm en erawh chuan, he Slovenia international striker hi Red Devils squad chhungah tlan chak ber palina (4th) chauh a la ni rih thung a ni.

Sesko hian 2025-26 season liam ta aṭanga a chawn hliam (shin problem) neih zui zel avangin kumin nipui laia Manchester United-in pre-season tour an neih zawng zawng chu a hmaih vek a nih kha. Amaherawhchu, kum 23 mi Slovenian forward hi tun season thar inṭan tirh lamah rawn kir lehin, league match hmasa pahnihah Michael Carrick chuan second-half substitute-in a luhtir tawh a ni.

Hull City leh Ipswich Town an hmachhawn ṭuma a inlan aṭangin Sesko hian top speed 33.2 km/h a tlan thleng a, hei hian pangana dinhmuna awm Bruno Fernandes-a speed 32.4 km/h chu a khum hret a ni.

Chutih rualin, Marcus Rashford chuan 33.3 km/h neiin pathumna dinhmun a hauh a, Bryan Mbeumo chu 33.6 km/h tlan thlengin pahnihna a ni bawk. He data-a mak leh langsar ber mai chu, tun season-a a defending lam sawisel hlawh tak defender Luke Shaw chu Carrick-a hnuaia player tlan chak ber niin, 34.4 km/h lai a tlan thei a ni.

Substitute anga match hnih a inlan chhung hian Sesko hian km 5.8 a thui a tlan hman a, fitness ṭha famkim neih chhoh leh tumin sprint vawi 10 lai a nei hman bawk a ni.

Zirtawpnia pre-match press conference-ah head coach Michael Carrick chuan an striker chungchang hi sawiin, "Ben hi a ṭha chho zel a, a fitness pawh a siamṭha chho reng a ni," tiin Manchester United official website chuan a tarlang. "Chawlhna hun a nei kha a pawimawh hle a — hma lam a pan zel theih nan leh harsatna dang tawk lova a kal theih nan hun pek a ngai a ni.

"Engtikah mah chutiang chu a tiam theih loh, mahse hei hian Ben-a tan theih chhung chu fit taka awm reng theihna hunṭha a pe a ni. Season liam ta khan hma a sawn nasa hle a, a la naupangin hetah hian a la insiamrem chho a, thil a la zir a, a la ṭhangzel a ni. Ben-a lakah hian beisei tur tam tak a la awm a, chuvang chuan a lakah dawhtheih a ngai a ni. A rawn kir leh danah hian ka lawm hle a, khelmualah a aia tam a inlan leh theih nan ka thlir reng a ni," tiin Carrick chuan a sawi belh bawk.

Sesko hi 2025 nipui transfer window laia manager hlui Ruben Amorim-a'n Old Trafford-a a lakluh a ni a, tunah hian United tan hian a season hnihna a hmang mek a ni.