Napoli midfielder Scott McTominay chuan Real Madrid zawm tura Manchester United manager hlui Jose Mourinho-a'n a ko a nih chuan, Napoli chhuahsan dan tur ngaihtuah a inhuam thu a puang.

Kum 2024 nipui liam ta khan McTominay hi Manchester United aṭangin Napoli-ah a insawn a, Naples khawpuiah fan-te ngainat rawn a hlawh chho nghal hle a ni. Season liam ta (2024-25 season)-ah khan he Scotland international hian Azzurri tan goal 13 ngawt khungin Serie A nomawi (Scudetto) an lakna kawngah a thawhhlawk em em a ni.

Season liam taa a chet ṭhat em avang hian Serie A Most Valuable Player (MVP) leh Footballer of the Year lawmman te a dawng a, kum 2025 Ballon d'Or vote laknaah pawh 18-na dinhmun a luah hial a ni. Kum 29 mi hi Napoli tan player pawimawh tak a la ni reng a, Naples khawpui chhung hmun hrang hrangah pawh a lim thlalak (murals) te siamsak a ni hial. Hetiang dinhmun luahtu ni mah se, Real Madrid-in an be a nih chuan hnawl a har a tih tur thu a pawm ta a ni.

Corriere della Sera (AS-in a tarlan chhawng)-in inbiakna an neihpuinaah, 'The Special One' tia hriat Mourinho-a kohna chu a hnar thei ang em tih zawhna chu chhangin, McTominay chuan helhhawlh lovin, "Mourinho-a'n Real Madrid zawm tura min ko a nih chuan, a takin ka ngaihtuah ngei ang," tiin a chhang a ni.

Nipui ṭan tir lam khan Mourinho hi a vawihnihna atan Bernabeu-ah a kir leh a, Real Madrid head coach hna a rawn chelh leh a ni. Mourinho leh McTominay te hian senior football a ṭan tirhte aṭangin inlaichinna bik tak an lo nei tawh a. Kum 2016-17 season khan Portuguese manager ropui hian Manchester United-ah inthlitfikna hun ṭha pein Arsenal lakah a senior debut a lo hmangtir a nih kha.

A season leh (2017-18)-ah McTominay hi Mourinho-a'n a rinrawl chho tial tial a, Premier League leh Champions League match harsa tak takah hmangin match 23-ah a khelhtir a ni. Season tawpah phei chuan Mourinho hian a mimal lawmman pek 'Manager's Player of the Year' atan McTominay hi a thlang hial a ni.

He inzawmna hi a la nghet hle chungin, McTominay hi kum 2028 June thleng daih contract neiin Napoli-ah a hmabak a la nghet thawkhat a. A career vanglai hmang mek a nih angin khelmualah hun zawk hman tam a mamawh hle a, Real Madrid hi zawm ta se, he position-ah hian Jude Bellingham leh Arda Guler te an awm miau avangin bul ṭan nghet nih chu thil chiang sa a ni lo.

Antonio Conte thlaktu atan Max Allegri ruat ni mah se, McTominay hi Napoli ruahmannaah a pawimawh ber pakhat a la ni reng a, tun season Serie A match pahnih khelh tawhah pawh bul a ṭan ve ve tawh a ni. Mahse, a lung phut dan pangngai lo tenau (benign arrhythmia) enkawltir nana inenkawlna tlem (minor procedure) a neih a ngaih dawn avangin international break zawh thleng chu khelmual a chhuahsan rih a ngai dawn a ni.