Nipui transfer bazar khar ni tawh mah se, Manchester United tan chuan transfer boruak hi a tawp chuang lo. Tunah hian January transfer window leh a dawt leh atana an head coach Michael Carrick-a squad thuamchakna tur player thar lakluh dan tur chu an thlir lawk mek a ni.
Kumin nipui chhung khan United hian Andrey Santos, Youri Tielemans leh Carlos Baleba te an lalut fel tawh a. Goalkeeper Karl Darlow pawh free agent-in Leeds United aṭangin an la bawk a, Tynan Thompson, Kit Margetson leh Cristian Orozco te pawh an lalut bawk. Chutih rualin, squad-ah hmun pawimawh tak tak hnawhkhat loh an la nei nual a ni.
United hian kumin nipui transfer bazarah khan Bournemouth midfielder Alex Scott lakluh an lo ngaihven tawh a. Chelsea pawhin kum 23 mi Scott-a man atan hian £64m thehchhuak mah se an hlawhchham a ni. Scott-a contract hi kum 2028 nipui thleng a ni a, kumin nipui khan contract thar ziah a hnawl avangin nakkumah chuan a man tlawm zawkin United hian an la thei maithei a ni. A farnu Maya Le Tissier hi United Women's team captain a nihna hian Old Trafford pana a chhuah theih nan phurna a thlen lehzual bawk ang. Hemi bakah hian Real Madrid midfielder Aurelien Tchouameni pawh United hian Monaco-a a khelh lai aṭang tawhin an lo ngaihven tawh a. Kum 26 mi, World Cup champion hi Real Madrid-in man to takin chhiar dawn mah se, kumin season-a khelhna hmun a chan tlem chuan nakkum nipui hi United tan he khawvel class defensive midfielder lakluhna hunṭha ber a ni thei ang.
Tlar hnung lamah Spurs defender Micky van de Ven chu United hian an ngaihven hle a, mahse he Dutch defender hian contract thar ziakin Spurs captain thar atan ruat a ni zui a ni. Engpawh nise, Lisandro Martinez-a hliam neih reng hian United boss Carrick-a chu kum 25 mi tlan chak tak Van de Ven-a dinhmun thlithlai tur hian a nawr thei a ni. Everton defender Jarrad Branthwaite pawh United hian an la thlahthlam lo. Kum 2024 nipui khan kum 24 mi Branthwaite hian Old Trafford pan tur hian mimal inremna a lo siam tawh a, mahse Everton-in United dawrna vawi hnih ngawt an lo hnawlsak a nih kha. Hliam vangin buai deuh rih mah se, he defender palian tak hian theihna tam tak a la nei a ni.
Left-back position hi United tana an ngaihpawimawh ber a ni mek a, a chhan chu Luke Shaw-a thlaktu tur senior player Diogo Dalot leh Noussair Mazraoui chauh an neih bakah kum 19 mi Harry Amass chauh an kawl vang a ni. Newcastle left-back Lewis Hall chu kumin nipui khan United hian lakluh an lo tum tawh a, mahse Newcastle-in an player pawimawh dang an hralh nual tawh avangin Hall hi hralh an phal ta lo a ni. Kum 21 mi Hall hian Old Trafford pan hi a chak hle a, United hian nakkum nipuiah chuan dawr nawn leh an tum a ni. Barcelona left-back Alejandro Balde pawh United hian an lo ngaihven tawh a, mahse a man chungchangah an inrem loh avangin an inhnukdawk rih a ni. Kum 22 mi Balde hian Barca-ah kum 2028 thleng contract a la nei a, mahse Joao Cancelo-a luhna leh rawlthar Xavi Espart-a rawn chhuah chhoh mekna hian Balde-a lakluh theihna kawng hi United tan a hawng maithei a ni.
Arsenal rawlthar Myles Lewis-Skelly pawh United hian an thlithlai reng a. Arsenal-in Newcastle aṭanga Bruno Guimaraes an lakluh khan he rawlthar hian hmun a chan tlem an rin avangin United hian lakluh an lo beisei hman a ni. Lewis-Skelly hian Emirates-ah cham chhunzawm rih mah se, tlar laili leh tlar hnung sir lama inelna a san em avangin hmun a chan tlem chuan chhuah a duh leh thuai maithei. Midfield leh left-back-a khel kawp thei a nihna hian United hotute mit a la lehzual a ni.
