Kum 10 liam taa Marcus Rashford nena Manchester United tana an match hmasaber khelhdun tawh Joe Riley chuan tunah chuan insurance zawrh hna thawkin eizawnna dang a zawm tawh a, mahse a hun kal tawh avanga inchhirna engmah a neih loh thu a sawi chhuak.

Kum 10 liam ta khan manager Louis van Gaal-a hnuaiah Europa League-ah Danish club Midtjylland an hmachhawn ṭumin Riley hi left-back-ah a inlan a. Khatih laia kum 19 mi hian minute 79 chhung khelmualah hun hmangin, lakchhuah a nih laiin Old Trafford mipui chuan ding chunga kutbeng (standing ovation) in an lo thlah a nih kha.

Kha match ngeiah khan Marcus Rashford pawhin United tana a match hmasaber a khel ve bawk a, goal hnih khungin senior level-ah a career ropui tak tur bul a ṭan zui ta a ni. Rashford hian tunah chuan professional match 400 chuang khelin England tan pawh vawi 78 lai a inlan tawh a ni.

Chutih laiin Riley erawh chuan, Under-18 lama Rashford, Napoli midfielder Scott McTominay leh Crystal Palace goalkeeper Dean Henderson te nena lo khelho tawh ṭhin ni mah se, semi-professional football khelh chungin eizawnna hrang hlak a zawm ta thung. Kum 10 chhungin an kawng zawh a inpersan hle chung pawhin, a thiante anga khelmuala a hlawhtling ve ta lo chu a vui lova, a nun bung thar chu hlim takin a pawm zawk a ni.

BBC Sport hnenah Riley chuan, "Scott McTominay nen kum ruk chhung in khatah kan khawsa dun a, Marcus nen pawh academy aṭangin kan rawn inkhawh chho dun a ni. Heng mite hi ka chhungte ang mai an ni.

"United tan match tam zawk khelh ve theih chu ka duh ngei mai, mahse thil erawh ka beisei ang khan a kal ta lo a ni. Ka hun kal tawhah ka innghat reng lo a - thil a lo thleng tawh hrim hrim pawh kha ka lawm tawk em em a ni.

"Tunah chuan ka nun bung thar turah ke ka pen lut tawh a. Ka dam chhung atana min chawm zo tur eizawnna dangah hma ka sawn mek a ni," tiin a sawi.

Khami season khan Rashford chu Wembley-a FA Cup final-a Crystal Palace an hneh ṭum telin first-team tan vawi tam tak a inlan chhunzawm zel a, Riley erawh chu senior squad tan vawikhatmah a inlan nawn ta lo a ni.

Kha mi ṭuma a thil tawn sawichhuak lehin Riley chuan, "Match ṭha tak ka khel a, mahse Marcos Rojo leh Luke Shaw te hliam aṭanga an rawn dam chhoh leh mek avangin, first-team tana ka game hnuhnung ber a ni thei tih kha ka ngaihtuahnaah a awm reng a ni," a ti a, a ngaihdan chu a dik ta chiah bawk.

May 2016-a Van Gaal ban a nih hnua Jose Mourinho a rawn luh hnu pawhin he defender hian first-team training a la zawm chhunzawm reng a, under-23 captain atan ruat a ni bawk. Mahse kum 2017 aṭang khan inhliamna hrang hrangin a tlakbuak zui ṭan ta a ni.

Kum 21 a nihin first-team match hnih chiah khelin United a chhuahsan a, hliam vanga harsatna a tawh zui zel avangin English league hniam lamah a khel thla ta zel a. Hliam avanga a inenkawl lai ngei hian eizawnna thar atana zirlai zir a thlang ta zawk a ni.

Lancashire-a Lytham khuaa seilian, kum ruk mi lek a nih laia United zawmtu Riley hi tunah chuan English football-a league pasarihna (seventh tier) huanga khel Warrington Rylands tan a khel mek a ni.

Kum 29 mi Riley hian National League club Fylde leh Tamworth-ah te a khelh hnuin full-time football chu a chawlhsan a, Sale khuaa financial company pakhatah financial protection adviser hna thawkin life insurance leh hriselna lama venhimna (insurance) a zuar mek a ni.

"Ka hna hi nuam ka ti em em a ni," tiin Riley chuan a sawi a. "Full-time football aṭanga part-time-a insawn chu player dangte ang bawkin ka lo hlauhthawn ve ṭhin thil a ni a. Mahse ka hna thar hi a hlawkthlak hle a, nipui laia ka zawm Warrington Rylands-ah pawh nuam ka ti hle bawk.

"Investment leh pension lam ṭanpui thei turin wealth manager nih tumin exam ka pe ṭan tawh a. Full-time-a football khelh leh hi ka duh tawh lo. Hun remchang rawn inhawng leh pawh nise, football piah lama ka nun buatsaih kawngah hian thui tak ka kal tawh tlat a ni," tiin a sawi zui bawk a ni.