Transfer deadline day-a Manchester United tana beidawnthlak ber mai pakhat chu Leicester City rawlthar Louis Page lakluh an tumna a hlawhtling ta lo kha a ni.

United hian he Leicester City midfielder naupang tak hi lakluh tumin a tawp thlengin inbiakna an neihpui a, mahse Foxes nen a man zat turah inremna an nei thei ta lo a ni. Hei vang hian United ṭantute chuan Page hi an chang ta lo hlen mai dawn em maw tiin an ngaihtuah hle bawk.

Mahse, hemi hnu lamah pawh United hian he player hi lakluh tumin an la bawhzui leh dawn niin beiseina a lian hle a ni. Thawhṭan zan khan Louis Page hian Plymouth Argyle lakah Leicester City tan bul a ṭan a, United fan-te erawh chuan Old Trafford lam a rawn pan an lo beisei zawk a nih kha.

The United Stand nena an inkawmnaah, journalist Ben Jacobs chuan club pahnihte inkarah inbiakna hi rang taka chhunzawm a nih theih thu a sawi a ni.

Jacobs chuan: "Ka thudawn dan chuan Man United hian he player hi lakluh a, nakin atana inremna lo siam lawk (pre-agreement) emaw, Leicester-a loan-a chhuahtir leh nghal kha pawi an ti lo hrim hrim a ni. Chuvangin Plymouth laka a khelh khan awmze thui tak a nei lo a, mahse an inleina man bithliahah erawh inthlauhna lian tak a awm a ni.

"Club pahnihte hian ni tlemte lo awm tur chhung hian pre-agreement siam tum rilruk chungin he inbiakna hi an chhunzawm zui thei viau ang. Louis Page-a'n Man United a zawm theihna kawng hi a la tawp chuang miah lo a, transfer window pawn lamah pawh inremna lo siam lawk mah se thil danglam vak a awm dawn chuang lo, a chhan chu engpawh nise tun season chhung hi chu Leicester-ah a cham dawn sa hrim hrim niin ka hria," tiin a sawi.

Nakin zela Louis Page-a hmabak chu engpawh nise, tun dinhmunah Leicester City-a thil thleng mekte hian he rawlthar tan hian hlawkna a rawn thlen theih a beiseiawm hle a ni. Foxes hi League One lama an tlak thlak tak avangin an squad-ah danglamna lian tak a thleng mek a ni.

Kumin nipui chhung ringawt pawhin player 20 ngawtin Leicester hi an chhuahsan tawh a, chung zingah chuan Charlton pana chhuak ta central midfielder Oliver Skipp pawh a tel a ni. Hemi awmzia chu tun season chhung hian Page hian Leicester tan inkhelhna hmun a chang tam dawn tihna a ni a, hei hian a theihna tihhmasawn kawngah nasa takin a ṭanpui ang a, United scout-te pawhin uluk lehzuala an thlithlai theihna hunṭha an neih phah bawk dawn a ni.