Everton mual, Hill Dickinson Stadium-ah Manchester United chuan hun tawp injury time-a an goal chhuah avangin Everton lakah 2-2 in an inhnehtawk a, point khat chauh an hlawhchhuak. Michael Carrick-a naute hian point thum an hlawhchhuak ngei dawn emaw tih hnuah, hun tawp huna goal an chhuah leh thut avangin kar pawimawh tak an hmachhawn turah an rilru a na hle ang.

United hi tun season bul ṭannaah an chet dan a la mumal lo hle a. Season match hmasaberah Premier League-a kaisang thar Hull City laka 2-0 a an tlawm avangin ngaihṭhatlohna a awm nghal a, mahse an match dawtah Ipswich Town chu 5-0 ngawta an sawp leh avangin an insiamṭha leh niin a lang. Pathiannia khualmuala Everton an hmachhawn ṭum hian hmasawnna chhunzawm theihna hunṭha an nei a, chutiang chuan an kal dawn niin a lang hman bawk a ni.

Second half ṭan hlimah Bryan Mbeumo-a'n mawi takin goal a khung a, United hian hma an hruai a. Hun rei zawk chu United hian an khelh ṭhat miau avangin hnehna an chang mai dawn emaw tih a nih laiin, inkhelh tawp dawn minute 8 chiah a awm tawh tihah Tyrique George chuan Everton tan an siphurh a rawn sut a. Mahse minute 87-naah Benjamin Sesko chuan United tan goal hnihna a rawn khung leh a, chakna goal a nih tawh ngei an inbeisei hman a ni.

Mahse he inkhel hian thawnthu dang a la kawl reng a. Hun tawpa minute 6 pek belh (added time) a liam hnuah, United penalty area pawn hret aṭanga ball per rawn tla chu Ainsley Maitland-Niles chuan hla tak aṭangin a pet kawh lut a, goalkeeper Senne Lammens-a khawih hman lovin goal-ah a lut a, mualneitu Everton chuan point khat an hlawhchhuak ta a ni.

He inkhela Marcus Rashford-a thlaktu tura minute 70-naa rawn lut Patrick Dorgu chu Gary Neville chuan hun tawpa goal an chhuah chhanah a puh a. Rashford hian inkhelh zawh veleh a rilru a phawrhchhuak nghal bawk a ni.

Match hnih a zawnin bul ṭantu kum 28 mi Rashford chuan a Instagram account-a follower maktaduai 22.3 a neih te hnenah thuchah hnutchhiahin, "Vawiinah point thum kan hlawhchhuak zo ta lo chu kan vannei lo hle mai! Rahṭha chu kan la hmu thuai ang. Ningani inkhel aṭangin kar pawimawh tak kan hmachhawn ṭan dawn e," tiin a ziak a ni.

Rashford-a thuziah hnuaiah hian season liam taa Barcelona-a loan-a a awm laia a khelhpui ṭhin player pahnih—Roony Bardghji leh Fermin Lopez te pawhin comment an hnutchhiah a. Bardghji chuan "Man like Rashy" tiin a rawn chhang a, Fermin chuan kutbeng lai leh mitah hmangaihna thinlung awm emoji a rawn dah bawk. Rashford hi loan a hman zawh hnu khan Camp Nou-a ngheta kir leh tura sawi a nih laiin, Old Trafford-ah cham chhunzawmin Carrick-a hnuaiah a theihna phochhuah leh a tum mek a ni.

Rashford-a aia rawn lut Denmark international Dorgu erawh Manchester United defender hlui Neville-a'n a sawisel hle a. The Gary Neville Podcast-ah Sky Sports pundit Neville chuan hun tawp dawna Maitland-Niles-a goal khung theih dan chhui chhuakin heti hian a sawi:

"Kha goal hnuhnung ber kha a ṭha lo takzet a ni. Dorgu kha eng emaw chhan vangin a tlan chhuak a, tlarhma lamah amah chauhin a va nawr (isolated press) a ni. Andrey Santos lah khan a hnung a rawn khuhsak lo va, hnung lamah a ding reng thung.

"Ball chu Dorgu-a bul hnaiah an in-pass tlang a. Dorgu-a tan tihsual lian tak a ni. Dorgu-a tihsual lian tak ni mah se, Santos-a'n va press turin a lo hrilh pawh a ni maithei. Mahse ka thlir dan chuan, inbiakpawhna ṭha an neih loh vang a ni," tiin a sawi chhuak a ni.