Manchester United head coach Michael Carrick chuan kumin nipui transfer window chhung khan club sum dinhmun avangin chet lak danah nghawng a awm tih pawm mah se, squad a neih zui tak mekah chuan a lungawi tawk hle tih a sawi.

United hian kumin nipui transfer bazar chhung khan midfielder pathum lakluh nan £155million an seng a, Chelsea aṭangin Andrey Santos, Aston Villa aṭangin Youri Tielemans leh Brighton aṭangin Carlos Baleba te chu Old Trafford-ah an senglut a. Goalkeeper Karl Darlow pawh a thlawnin (free transfer) an la bawk a ni. An player hralh chhuah leh lei inthlauhna (net spend) hi £100million chuang hret chauh niin, an elpui club dangte'n sum tam tak an thehchhuah laiin United erawh sum hman kawngah an insum hle thung.

Carrick chuan sum dinhmun khan nghawng a neih thu zep lo mah se, player an lakluh tharte theihnaah a lawm hle a, season liam ta aia squad chak zawk an nei tawh tih a sawi. "Nipui transfer bazar kan luhchilh khan season liam taa squad kan neih aia chak zawk din kan tum a, chu chu kan ti puitling ngei bawk a ni. He kawngah hian hna ṭha tak kan thawk niin ka hria. Sum leh pai dinhmun chu a nihna ang ang hi a ni a, kan neih ang tawk aṭanga a ṭha ber chhawr chhuah chu kan tum a ni," tiin Carrick chuan a sawi.

Carrick chuan sawi zawmin, "Kan squad-a kan lakluh thar player-te lakah hian ka lawm takzet a ni. Kan player lakluhte theihna leh an dinhmun thlirin indawrna ṭha tak kan nei niin ka hria a, ka hlim em em a ni. Thil dang tih theih emaw, tih theih tur awmte chu thlirlet reng theih a ni a, ṭhenkhat chu a theih laiin ṭhenkhat erawh a theih loh thung. Hei hi squad siamṭhat chhoh zelna pêng pakhat a ni a. Hnawhkhat tura kan mamawh zualte chu kan nei tawh a, tunah chuan squad chhungah inbuktawkna ṭha tak kan nei tawh a ni," a ti bawk.

Ineos-in club thuneihna an chan hnuah United chu transfer bazar-ah sum hman kawngah an fimkhur hle a, Carrick pawhin sum sên man hlawk thei ang ber zawn chu an thil tum ber a nih thu a tarlang. Sum dinhmun chungchanga khapna (restrictions) a awm em tih zawhna chhangin Carrick chuan, "Khapna a awm ka ti lo a, kan dinhmun a nih ang ang chu ka sawi mai a ni. Sum zat lam ka sawi lo. Sum engzat pawh nei ila, a theih ang tawka ṭhahnemngai taka hman a, sên man hlawk bera hman chu kan duh ber a ni. Kan sum hman zat aṭang hian a hlawkna kan tel chiang hle tih rual a ni lo a, kan player lakluhte avang hian a let aia tam hlawkna kan hmu zawk a ni. Keimahni theihna zawnah chauh rilru ka pe a, kan theihna zawng zawng thehchhuah kan tum a, chu chu kan ti tawh niin ka hria," tiin a sawi.

United hian Luke Shaw-a thlaktu tur left-back pangngai lakluh an tum hle a, a tirah an lak luh tum ber Lewis Hall lak theih an tum hnuah an hlawhtling lo a. Transfer khar dawn lamah Manchester City player Rayan Ait-Nouri leh Barcelona defender Alejandro Balde te lakluh tum viau mah se an la thei ta lo a ni.

Chutiang dinhmun karah pawh Carrick chuan a squad neih laiah lungawi zawk a thlang a, "Squad famkim hi khawiah nge awm ngai? Dinhmun mila insiamrem dan zawn zel a ngai ṭhin. Team din chhoh mek lai leh a sang ber nih tuma hma kan lak mekah hian, ke pen chhoh zel a ngai a ni. Thil hi vawikhata tihfel thut theih a ni lo. Player mimal chungchang chauh ka sawi lo a, squad pum anga hmasawnna kawng zawh a ngai a ni. Zan khat thil thua chinfel a, league hmahruaitu nih a, tah chuan awm reng theih a ni lo. Hma kan sawn zel theih nan kawng thui tak kan la zawh a ngai a, a tawpah chuan kan thlen duhna hmun kan thleng ngei ang," tiin a tlip a ni.