Transfer window khar fel ni tawh mah se, Manchester United chuan Leicester City rawlthar theihna ngah tak Louis Page lakluh tumin hma an la chhunzawm zel a, he midfielder kum 18 mi hi Old Trafford-a lakluh ngei an inbeisei hle a ni.
Deadline day khan he tlangval lakluhna tur inremna hi club pahnihte'n an duhdan an inrem theih tak loh avangin a ṭhulh a, Plymouth Argyle nena Foxes inkhelh tura Page-a hming a tel ve takah khan he transfer boruak hi a tawp mai tura ngaih a ni hman a. Mahse, transfer window khar a nihna hian thil a thlak danglam tehchiam lo. Leicester City hian Manchester City-in kum 17 mi Jeremy Monga an lakluh ṭuma £10m bakah add-ons £2.5m an pek zat aia tam an phut a, he inremnaah hian Page hi kumin season atan Leicester lama loan-a chhuahtir leh nghal tur a ni bawk.
July thlaa kum 18 tling chauh Page hian season liam ta khan Championship-ah match 18 a khel a, tun season-ah pawh Russell Martin-a hnuaiah first-team tan a inlan zing hle. Arsenal lamin he England Under-19 international hi ngaihven nawn leh mah se, Page hian Manchester-ah chhungte a neih bakah Old Trafford-a hma hun an duan chu a duh zawk hle a, January transfer window inhawn hunah he inremna hi tihfel hman beisei a ni.
Bruno Fernandes-a contract chungchang
Nipui chhung khan United chuan an captain Bruno Fernandes hnenah contract thar ziahpui tumin inbiakna ṭanphak an lo nei tawh a, transfer window khar hnu lama inbiakna thuk zawk kalpui an ruahman a ni. Kumin nipui tawp lamah Turkish club Galatasaray lamin Fernandes hi kum khata hlawh tam tak pe tura an ngaihvenna khan sawi a hlawh hle a nih kha. Fernandes hian kumin season tawpah contract a hmang zo dawn a, United hian kum khat dang pawhsei theihna option an nei thung. Thawhlehnia kum 32 tling tur Portuguese playmaker hian hlawh ṭha tak a phu chho hle a, Marcus Rashford-a'n kar khata £325,000 hlawha squad a rawn fin leh takah phei chuan United hian ngunthluk taka an ngaihtuah a ngai dawn a ni.
Harry Amass leh Chido Obi dinhmun
Transfer window khar dawn ni hnih velah Burnley chuan kum 19 mi left-back Harry Amass lakluh tumin £3.5m an thehchhuak a, mahse United chuan an hnawlsak a. Amass hi deadline day khan loan-a lak duhtu awm bawk mah se United-in chhuahtir an remti lo a ni. Tun season-ah Premier League matchday squad-ah a la inlan lo na a, deadline day-ah first-team training a zawm a, club hian kum khat contract pawhsei theihna option an nei bawk.
Striker rawlthar kum 18 mi Chido Obi erawh Dutch transfer window khar dawn lamah Eredivisie club Willem II chuan loan-in an lalut ta thung. EFL league hniam lama innuai phurna aiin naupang chawikanna kawnga hmingṭha Willem II chu a mize zawi tak nen a inmil zawk tura ngaih a ni.
Dalot-a record leh Carrick-a thusawi
Right-back Diogo Dalot chuan bul a ṭan ṭumin tlawm loh record 17 (vawi 14 chak, 3 draw) a nei tling ta a. Michael Carrick-a hnuaia United tlawm vawi thum (Newcastle, Leeds leh Hull) lakah khan Noussair Mazraoui zawk bul ṭantir a ni vek a ni. Everton match hmaa press conference-ah Carrick chuan transfer chungchang sawiin: "Sum leh pai dinhmun leh kan theihna ang zela thawhin, a ṭha thei ber thehchhuah kan tum a ni," tiin sum chevel bituk khauh a nih zia a tarlang a ni.
