Manchester United chuan an elpui lian Liverpool rawlthar Isaac Konde lakluh nan inremna an siam fel ta niin chanchinbu hrang hrang chuan an tarlang. Kum 16 mi midfielder hian Old Trafford a pan theih nan darkar 24 liam ta chhung khan club pahnihte hian dan kalhmang pangngai zawng zawng an tifel tawh a ni.
Transfer chanchin hrechiangtu Fabrizio Romano-a'n a tarlan danin, United leh Liverpool te hi he rawlthar chungchangah hian an inrem fel tawh a ni. Konde hian tun season Under-18 Premier League-ah Liverpool tan vawi ruk a inlan tawh a, assist vawi khat a nei tawh bawk a ni.
He lakluhna hi United academy leh youth team thuamchak tura ruahmanna an neih zela thil thleng a ni a. Tun hnaiah United hian an rawlthar ṭhenkhat chhuahsan an lo nei nual tawh a, chuvang chuan a aiawhtu tur naupang theihna nei ṭha lakkhawm zung zung chu an tum a ni.
Nipui transfer bazar liam ta chhung khan Premier League champion lai Arsenal chuan United aṭangin academy player Habeeb Ogunneye leh James Scanlon te chu a nghetin an lo lalut tawh a. Hei bakah hian striker naupang Louie Bradbury pawhin Carrington chhuahsanin Championship club Stoke City a zawm fel ve bawk a ni. Kum 17 mi Bradbury hian Stoke City nen hian kum hnih daih contract an ziak a, 2028-29 season thlenga pawhsei theihna clause a tel bawk.
Bradbury hian Zirtawpni khan Manchester United hi a chhuahsan a, Inrinni-ah a club thar Stoke City tan inkhelin an hmelma Manchester City lakah hat-trick a rawn siam nghal a ni.
A chhuah chungchangah hian Manchester United chuan thuchhuah siamin: "Academy forward Louie Bradbury chuan Championship club Stoke City a zawm theih nan inremna a siam fel ta a, registration tihfel chauh a ngai tawh a ni. Shrewsbury-a piang striker hian Under-14 level-ah United a zawm a, kum 2025 khan scholarship a hmu bawk a ni. 2024-25 season chhung khan Under-18 tan vawi nga inlanin, Adam Lawrence-a hnuaiah FA Youth Cup fourth-round match-ah hun tawp lam substitute niin a debut a siam a. Season liam ta khan Under-18 Premier League-ah goal riat ngawt a khung a, Premier League 2 lamah pawh a inlan hman bawk a ni. Manchester United-a mi zawng zawng hian Louie hi a hmalam hunah duhsakna sang ber kan hlan e," tiin an nemnghet a ni.
Bradbury bakah hian United chuan Leicester City rawlthar langsar Louis Page pawh lakluh tumin hma an lo la tawh a. Mahse transfer deadline hma chiaha club pahnihten inremna an neih hman tak loh avangin, he rawlthar theihna ngah tak hian League One club-ah hian a hun a hmang zui ta zawk a ni.
Hetianga rawlthar ṭhenkhat an chhuah tak nual avangin United academy lam pawhin rang takin khelmual laili thuam chak nan Liverpool naupang Konde hi an bawhzui nghal a. Youth team aṭanga senior team thlenga hmasawnna tluantling neihpui theih tur naupang zawn chu Old Trafford hotute ngaih pawimawh ber a nih avangin, Konde-a rawn lut tur hian United academy chhungah phurna thar a thlen ngei beisei a ni.
