Nipui transfer window khar a nih tak hnu hian, Manchester United chuan an squad zinga mi player 11 lai chu hmun hrang hrangah loan-in an chhuahtir a. September ni 5 leh ni 6 kar tawp liam ta khan heng loanee te hian an club khelhna ṭheuhvah inkhelh hmachhawnin boruak hrang hrang an tawng a ni.

Goalkeeper Andre Onana chuan Turkey ramah hun ṭha a hmang a. Trabzonspor tan mahni mualah Genclerbirligi chu 5-0 ngawta an sawp ṭum khan a inlan a, United goalkeeper hian shot hlauhawm vawi nga (5 saves) ngawt lo dangin clean sheet a vawng zui bawk a ni.

National League North lamah erawh goalkeeper Solomon Honor tan thil a kal tluang lo thung a, Southport chu mahni mualah Spalding United lakah 2-0 in an tlawm a ni.

Switzerland lama khel Sekou Kone chuan FC Vaduz an luhchhuah ṭumin bench aṭangin bul a ṭan a, Lausanne hi khualmualah 3-1 in an tlawm a ni. First-half 1-1 a nih laiin half-time-ah Kone hi luhtir a ni a. An tlawm zui ta na a, Mali rawlthar hian a theihna pholangin a ball pass zinga zaa 91 (91%) ngawt chu a ṭhiante hnenah a thlen dik a ni.

Goalkeeper Altay Bayindir erawhin Old Trafford-a bench a chan ang thovin Spain-ah pawh hun a la hmang zui a, Celta Vigo tan bench aṭangin a inlan lo leh bawk. Scottish club Greenock Morton tana khel goalkeeper Elyh Harrison chuan minute 90 chhung a khel tluan ve thung a, mahse a team te chu 2-1 a an tlawmna a chhanhim zo ta lo a ni.

Midfielder Jacob Devaney chuan Hibernian tan bul a ṭan a, St. Johnstone laka 2-1 a an tlawm ṭum hian minute 61 chhung khelmualah a awm a. Player pathum thlak rualnaa lakchhuah a nih hmain ball vawi 52 khawihin, pass 88% a hlawhtling a ni. Lincoln City-a awm striker Ethan Wheatley erawh Blackburn an hmachhawn ṭumin bench-ah a ṭhu tluan a, Championship debut a la nghah rih a ngai thung.

League Two lamah Jayce Fitzgerald chuan Rotherham United tan Bristol Rovers lakah a vawikhat nan bul a ṭan ve bawk a. Midfielder hian minute 61 a khelh chhungin yellow card a hmu a, chance khat siamin vawi 38 ball a tawk bawk a, mahse Rotherham hi 1-0 in an tlawm zui ta a ni.

Luton Town tana khel Dan Gore chuan Leyton Orient nen 1-1 a an inhnehtawk ṭumin substitute aṭangin minute 29 a khel a, yellow card a hmu bawk. A inlan chhung reiloteah hian ball vawi 32 tawk hmanin key pass vawikhat a pe a, tlarhnung venhim kawngah vawithum a inrawlh bawk.

Scotland lamah Jack Moorhouse chuan Dundee tan debut ṭha tak a nei a, Hearts an hmachhawn ṭumin half-time-ah lutin minute 45 chhung a inlan a. Goal ban (woodwork) a pet per hman nghe nghe a, debut goal duhawm tak a khung ṭep a ni. Mahse, stoppage time-ah goal chhuahin Dundee hi 2-1 in an tlawm ta hlauh a ni.

Striker Chido Obi pawh Willem II tan a vawikhat nan bench aṭangin a rawn inlan a. Excelsior laka 3-0 a an tlawm mek laiin minute riat chiah a khel hman a, ball vawi hnih chauh a khawih hman a ni.