Kum 2021-a Manchester United interim manager atana ruat a nih hma khan, German coach Ralf Rangnick chuan United chu Luke Shaw thlaktu tur left-back naupang zawk an mamawh thu a lo sawi tawh a. Rangnick hian kum khat chuang a liam hmain England defender hi club lian Manchester United tana khel tlak a nih leh nih loh a rinhlelh thu a lo phawrhchhuak tawh a ni.

Khami ṭuma England international chungchang sawiin Rangnick chuan, "Bazarah hian centre-back naupang theihna nei ṭha tak tak an awm nualin ka hria. Chu bakah left-back thar an mamawh bawk niin ka hria a ni. Luke Shaw an kawl tih chu ka hria a, mahse Manchester United ang club lian mamawh ang level-ah a la awm chiah em tih erawh ka chiang lo," tiin a lo sawi a nih kha.

Kar kalta maia transfer window khar a nih hmaa United-in left-back thar an lakluh theih tak loh hnuah, Rangnick-a thuzawm loh video hlui chu a rawn lar thar leh ta hle a ni. Kumin nipui transfer bazar chhung khan head coach Michael Carrick chuan midfield thuamchak a ngaihpawimawh ber a, Chelsea aṭangin Andrey Santos, Aston Villa aṭangin Youri Tielemans leh Brighton aṭangin Carlos Baleba te chu an lalut fel a, goalkeeper department-ah Karl Darlow an la bawk.

Mahse left-back lakluh an tumna erawh a hlawhtling thei ta lo a. Newcastle defender Lewis Hall chu Carrick-a lak duh ber ni mah se, Magpies lamin he transfer hi an titawp hmiah a ni. Barcelona defender Alejandro Balde pawh an thlan dang ni mah se, deadline day-ah he Spaniard hian Spotify Camp Nou a chhuahsan ta bik lo. Left-back thar lak loh a nihna hian 2026-27 Premier League season match hmasa pahnih aṭangin Shaw-a khelh chhiat zia a tilangsar zual ta bawk.

Hull City laka 2-0 a an tlawm ṭum khan, United legend Wayne Rooney chuan Shaw-a chet dan chu sawiselin, "Hei hi chu Luke Shaw-a defence dan naupang chhia lutuk a ni. Man United-in line ṭha tak an nei a, Hull tan chuan hei hi an nghah reng chu a ni. Luke Shaw hi a hnufual a, a tlarhnung line aia yard nga laiah a awm hnung a, ball pek a ṭhat bawk si avangin dan theih rual a ni lo," tiin a lo sawisel hrep tawh a ni.

Hemi hnu hian Ipswich Town chu 5-2 in an hneh leh mah se, Tractor Boys ten goal hmasa ber an khung theih danah Shaw chuan BBC Radio 5 Live hnenah ama chet dan chu a sawisel ve tho a. "Keimah leh keimah ka inthiam thei lo a ni. Ka tawn hriat neih tawh aṭang chuan an goal hmasa berah khan hetiang aia ṭha hian ka che tur a ni a, kha kha ka nihna a ni lo," tiin a sawi.

Season liam ta khan Shaw hi Premier League match tin maia bul ṭan thei United outfield player pangana (5-na) a ni a, a theihna sang ber a phochhuak leh hman niin a lang. Mahse United hi Champions League-ah an kir leh tawh a, Patrick Dorgu pawh left flank hma lamah chhawr a nih tak avangin, United tlarhnung veilam chu an indaih loh phah ang tih an hlauthawng hle a ni.