Manchester United-in 2025-26 season an hman liam takah khan hlawhtlinna leh chanchin lawmawm langsar ber zinga mi chu Belgian goalkeeper Senne Lammens-a chet ṭhatna hi a ni chiang hle.

INEOS-in he Belgian goalkeeper lakluh nan hian Royal Antwerp hnenah a tirah £18 million lai an thehchhuah khan, Manchester United ṭantu tam zawk chuan amah hi an hre chiang lutuk lo a. Antwerp aṭanga an lakluh tirh hian beiseina lian tak a phur lem lo a, sum tam tham tak senga an lakluh he player hian Old Trafford-ah hmun a chang zo dawn em tih pawh mi tam takin an ngaihven nghal a ni. Mahse he goalkeeper hian a man phu ngei a nih zia pholang chho nghalin, 2025-26 season chhung khan United tana player thawhhlawk ber leh hlawhtling berte zinga mi a rawn ni chho ta hial a ni.

Kumin World Cup inelnaah khan Lammens hian a ram tana a khelhnaah tihsual lian tak (howler) a nei hlauh mai a, he a chetsualna avang hian mipui leh chanchinbumi lam aṭangin sawisel zui a tawk nasa hle a, mi tam tak chuan "World Cup villain" ti hialin an sawi a nih kha. Infiammi tupawh tan hetiang boruak rit leh harsa hi paltlang mai a awlsam lo va, khelmual chhung leh pawn lama sawiselna nasa tak karah a theihna a tlakhniam phah mai ang tih pawh hlauhpui a hlawh hle bawk.

Mahse chutiang boruak hrehawm zawng zawng chu kalsanin, United tana club duty zawm tura a kir leh hnuah Lammens chuan a rilru puthmang puitling zia a rawn pholang nawn leh a ni. A chetsualna kha rilrua pai reng lovin, theih tawp chhuahin club tan a inbuatsaih zui a, a theihna sang ber pholang chhunzawm lehin a khelh dan phung pawh "excellent" tia sawi theih khawpa ṭhain a rawn khel chho leh ta a ni.

He Belgian goalkeeper hian beidawng duh miah lova hma lam a pan theih dan leh a inpekna thuk zia hian Manchester United insiders-te (club chhungrila mite) chu a hneh em em a. A mize nghet tak leh a thawkrim tlat mai chuan club hnuaia thawktute chu a tiharh sawng sawng a ni ber e.

Old Trafford-a thawktute leh hotute chuan Lammens-a'n a harsatna tawh paltlanga, World Cup hnua khatiang taka che ṭha leh thei kha mak an tiin chhuanawm an ti hle a. Antwerp aṭanga £18m senga an lakluh, a tir lama fan-ten an hmelhriat lar em em loh khan tunah chuan club-ah rinrawl nihna a rawn chelh chho ta a, a rilru puitlin zia leh a huaisenna chu United tana thil hlu tak a tling chho zel a ni.