Manchester United Women head coach thar Eva Olid chuan naktuk zaniana Women's Super League (WSL) season thar bul an ṭan hmain press conference a vawi khat nan a nei a, heta a thusawi hian supporter-te rilru a tihlim hle a ni.

Spanish manager hi August thla tir khan United pui tur hian a rawn zawm a, naktuk zan hian London City Lionesses hmachhawnin WSL season thar an ṭan dawn a ni. Club official site hnena a sawi danin, a team tana a phut leh a style chu "attacking football" a nih thu tarlangin, "Ka rilruah chuan attacking football hman hi ka tum ber a ni a. Kan hmachhawn tur team-te kan tihnat theih dan turah ka rilru ka fuk tir tlat ṭhin," tiin a sawi.

A team-te rilru puthmang leh an khelh dan tur sawi chhunzawmin, Olid-i chuan, "Kan rilru puthmang ber chu nawr thut thut (attack) a ni. Ball thunun zawk nih a, football hmuhnawm tak khelh a, chance tam tak siam a, goal khung te hi ka rilru puthmang a ni. Tlarhnung venhim lamah pawh insamrem tak leh, rilru pek tak leh inpeih at a ngai ngei mai, mahse kan rilru puthmang ber erawh nawr thut thut a ni tur a ni," a ti bawk.

August thla tir aṭanga club a zawm aṭangin thil a kal pur pur mai tih sawiin, Heart of Midlothian coach hlui hian a ngaihdan leh a khelh dan phung sengluh tumin hma a la nghal char char a. Season liam ta leh kum kalta te nena an khelh dan phung danglamna chungchang sawiin, "A hmaa an lo khelh dan phung leh tuna ka khelhtir dan duh dan hi a inang lo hle a ni. Match hmasa ber hmachhawn taka chak ngei tura thil ngaihpawimawh hmasak ngai te chu ka dah pawimawh hmasa ber a ni," tiin a sawi.

An siksawi leh inthlakna a tam avanga mi ṭhenkhatin beiseina sang tak an nei lo a nih pawhin a hriatthiam thu a sawi a, mahse club chhung aṭangin thlawpna ṭha tak a hmuh thu a sawi bawk. Fans-te hnenah thuchah hnutchhiahin, "He thil hi chawlhkar tlemte chhung a puitling nghal mai chi a ni lo, mahse hun tlem kan neih chuan, a tira thil thleng thei tura kan ngaih lohte pawh kan ti puitling thei a ni," tiin a sawi.

A hmachhawn tur London City chungchang sawiin, kumin nipui bazarah player lakluh lamah an inthuam chak hle tih a hria a, mahse an hlau bik lo tih a sawi. "London City-in mimal thiamna nei ṭha (individual quality) an la lut nual a, mahse keini pawhin mimal thiamna nei ṭha tak tak kan kawl ve bawk. Engtin nge kan tihnat ang a, game kan chak ang tih chauh kan ngaihtuah tur a ni. Chu chu kan rilru puthmang tlat tur a ni," tiin a sawi.

Hemi bakah hian January transfer window-a player lakluh an tum dan ruahmanna pawh a sawi lang tel bawk. Olid-i chuan, "January thlaah hian ka khelh dan phung (game model) tana ka mamawh ngei ngei tur player-te lakluh nan ruahmanna kan nei a ni. Ka game model nena in-fit chiah lo tur player-te hmanhmawh taka lakluh mai hi ka duh lo a. Kan khelh dan tur nena in-fit tur player dik tak lakluh hi ka tum ber a ni. Chuvang tak chuan January tan hian ruahmanna kan nei a ni — hun pawh a awm zawk ang a, player dik tak kan la thei zawk dawn a ni," tiin fiah takin a sawi bawk.