Pathianni zan international match-ah Manchester United striker Joshua Zirkzee chuan Netherlands tan chakna goal a khung a, mahse ani bakah hian ram tana inlan United player dang an awm bawk. Portugal chuan Norway chu 2-1 in an hneh a, he hnehna an channaah hian United captain Bruno Fernandes leh full-back Diogo Dalot te chuan thawhhlawk takin hmun pawimawh an luah dun a ni.

Portugal camp aṭanga Cristiano Ronaldo-a chhuah thut hnuah kar liam ta chhung khan Portuguese team hian boruak rit tak an paltlang a. Mahse, hetiang boruak karah hian an match khelh paliah vawi li hnehna chang vekin (four out of four), Nations League A4 group-ah hma an hruai chhunzawm ta zel a ni.

Captain kawr ha tu Fernandes hian minute 89 chhung khelmualah hun a hmang a, match chhungin key pass vawi khat a nei a ni. Cross vawi thum a vawrh luh zinga pakhat a thleng ṭha a, pass a pek zawng zawng aṭangin za zela 85 (85%) a pe dik bawk. Fernandes hian Norway goal-ah vawi thum a shot a, a ball pet ṭha tak pakhat phei chu Norway goalkeeper Egil Selvik chuan harsa takin a lo dansak a ngai hial a ni.

A theihna dang pholang zelin, Fernandes hian long ball vawi li a vawrh luh chu a pe dik vek (100%) a, dribble a neih vawi khat pawh a hlawhtling thlap bawk. Tlar hma lam chauh nilovin, tlar hnung venhim lamah pawh a thawkrim hle a, clearance vawi khat, interception vawi khat leh duel vawi thumah a khingpui a hneh bawk a ni.

Hemi rual hian Diogo Dalot pawh minute 63-naah Joao Cancelo thlakin bench aṭangin a rawn lut a. He full-back hian minute 30 chhung khelmuala a awm chhungin leilawta ground duel a neih zawng zawng a chakpui vek (100%) a, tackle vawi khat a nei bawk a ni. Defender hian long ball leh pass a pek zawng zawng chu a pe dik vek (100%) bawk a, goal shoot leh dribble nei lo mah se a rintlak hle a ni.

Fernandes leh Dalot te hian November thla hmaa ram tana an mawhphurhna chu an hlen zo ta a, tunah chuan Manchester lam panin an kir leh dawn a ni. Inrinni tlaiah Manchester United hian match pawimawh tak maiah Tottenham Hotspur an hmachhawn dawn a, he inkhelah hian anni pahnih hi an inlan leh ngei beisei a ni.