Ningani zan khan kum thum chhunga a vawikhat nan Manchester United chuan Champions League match an khel leh ta a. Michael Carrick-a naute hian Sabah FK chu 4-0 ngawta sawpin, Carrick-a Champions League record pawh a la chhe lo tluang zel a ni.

He zan hi Argentina centre-back Lisandro Martinez tan phei chuan zan chhinchhiah tlak tak a tling a. United tlarhnungin clean sheet an neih bakah, kum 28 mi defender hian Champions League-a a goal hmasaber chu a khung ve ta hial bawk a ni.

Match zawh hnuah phur tak leh rilru zangkhai takin Martinez hian CBS Sports lam a kawm a, hetah hian a hmaa amah lo sawisel hrep tawhtu Liverpool defender hlui Jamie Carragher pawh studio-ah a ṭhu ve reng a ni.

Studio aṭangin Micah Richards-a'n he show-a pundit zingah tunge a ngainat ber tiin a zawt a, Martinez chuan Thierry Henry chu a thlang nghal chat a. Hemi hnu hian Henry chuan fiamthu pah deuhin, "Keini defender-te hi engtin nge min ngaih ve thung le?" tiin a zawt leh a ni.

Martinez chuan nui chungin, "Player thiam bik leh quality nei ṭhate inkhel thlir hi nuam ka ti ṭhin a ni," tiin tawi fel takin a chhang a.

Richards chuan a zawhna chhanna a duh ang a la hmuh loh avangin, Carragher-a khel ṭhin lai kha a en ve ṭhin em tih leh, defender a nihna anga a ngaihdan chu tlang takin a zawt zui ta a ni.

He zawhna hi Martinez chuan zahawm leh fing fel tak, nuihzatthlak zet si hian, "Player a nihna ang maw? Mi ṭha tak a ni," tiin a chhang ta thut a. He a chhanna avang hian CBS Sports studio chhung chu nui thawm leh kutbeng thawmin a ri nghal dur dur a, he video clip hi internet leh social media lamah pawh a darh chak hle a ni.

Carragher hian a hma khan Martinez-a lakah sawiselna a lo nei nasa tawh ṭhin a, Premier League-a centre-back ni tur atan a san zawng a tlem lutuk tihte leh a theihna chu a tawk lo tiin na tak takin a lo sawi tawh ṭhin a nih kha.

Sabah FK laka Champions League goal a khung takah hian, he tournament-a Martinez-a sulhnu pawh thlir let a ni a. He ball-playing defender hian Ajax-a a awm lai khan he inelna lianah hian match 23 ngawt a lo khel tawh a ni. Old Trafford a pan hnuah erawh United tan Champions League-ah vawi hnih chiah a la inlan a. Martinez hian Europe inelna sang berah hian yellow card vawi nga a hmu tawh bawk a ni.