Manchester United chuan Nilaithawhṭan zan hian Champions League league phase opener-ah Azerbaijan champion Sabah FK an mikhual dawn ta.
2023-24 season hnua a vawikhat nan United hian Europe inelna sang ber hi an khel leh dawn a, inelna kalphung thara an opponent pariat zinga a hmasaber hmachhawn tur hian an inbuatsaih mek. He match pawimawh tak hma hian thil phurawm leh pawimawh tak tak panga tarlan a ni.
United hian an club chanchinah Azerbaijan aṭanga rawn chhuak club an la hmachhawn ngai miah lo a, Sabah tan phei chuan hei hi history thar a ni dawn a ni. Premier League club dang Arsenal, Chelsea leh Tottenham te chuan Azerbaijan club-te lo hmachhawn tawhin, English club-te hian Azerbaijan club-te lakah record ṭha tak (100% winning record) an kawl a ni. Tun hma chuan Qarabag FK hi Premier League club-te'n an hmachhawn tlangpui ṭhin a ni a, mahse kumin hian kum 9 chauh la awm Sabah FK hian an rawn khum ta a ni.
Sabah manager Valdas Dambrauskas tan phei chuan he match hi a ropui danglam lehzual. He Lithuanian coach hian kum 20 liam ta khan Manchester United Soccer Schools-ah coach hna a lo ṭan tawh a ni. BBC Sport hnenah a phurna tarlang chhuakin Dambrauskas chuan, "He thil hi ka suangtuahna piah lam a ni. Kha tunnel aṭanga mualchhunga luh tur chu! Naupangte nen Old Trafford-ah hian vawi tam tak ka lo kal tawh ṭhin a, tunah erawh coach ka nihna angin ka rawn kal dawn ta a ni," tiin a sawi.
Match 13 a zawnin inelna hrang hrangah goal an khung tawh avangin Sabah hian United tlarhnung harsatna siamsak an tum hle ang. United hian tun season match thum an khelh tawhah match tin goal hnih zela an chhuah zel avangin, goalkeeper Senne Lammens chuan clean sheet hmasaber neih ngei a tum ru hle thung.
Forward Marcus Rashford hi tun dinhmuna United squad zinga Champions League-a goal khung hnem ber a ni a, he inelnaah hian overall goal 17 a khung tawh a, chung zingah chuan season liam taa Barcelona-a loan-a a awm laia goal 5 a khungte pawh a tel a ni. Barcelona aṭanga a rawn kir leh hnuah goal la khung lo mah se, a khelh dan a ṭhat em avangin Nilaithawhṭan zanah hian a goal chhiarkawp tihpun belh ngei a inbeisei hle a ni.
