Manchester United midfielder hlui Scott McTominay chuan Serie A-ah bul ṭan ṭha hle mah se, khelmual a chhuahsan rih a ngai dawn ta. McTominay hian a thin zaina (heart surgery) a neih a ngai dawn a, player leh a club lam hian dinhmun leh a chawlh rei dan tur an sawifiah nghal a ni.

Zaina a neih tur chungchang nemngheh a nih hnuah McTominay chuan, "Ka ṭha e, he thil hi club nen hun eng emaw chen kan lo ruahman tawh a ni," tiin a sawi. Club thuchhuah chuan, "Lungphu mumal loh hlekna (mild benign arrhythmia) a neih avangin, McTominay hian ni tlemte hnuah cardiac arrhythmia ablation (PFA) hmangin a siamṭhatna zaina a nei dawn a ni," tiin an tarlang bawk.

The Athletic-in a tarlan danin, Scotland international hian kar tharah he zaina hi a nei dawn a, hetiang zaina tawk thei footballer hmasa ber a ni lo. England leh Liverpool midfielder hlui Adam Lallana pawhin tleirawl a nih laiin hetiang zaina hi a lo nei tawh a, English player Colby Bishop leh Connor Goldson te pawhin an career chhungin invenna atan open-heart surgery an lo nei tawh bawk a ni.

NHS website tarlan dan chuan, lungphu buaina (arrhythmia) tih hi lungphu a ran lutuk emaw, a muan lutuk emaw, a nih loh leh a phut dan a mumal loh changa thleng a ni. He Serie A champion Napoli player hian kar laia Arsenal an hmachhawn tur chu a khel thei dawn lo a, mahse international break a awm dawn avangin match tam lutuk erawh a hmaih a rinawm loh thung.

Chutih rualin, Napoli sporting director Giovanni Manna chuan he player chawlh rei dan tur hi a nemnghet thar a ni. "Sporting fitness nei leh turin ni 28 vel a duh dawn a, a chhan chu thisen khal tur venna (anticoagulant drugs) damdawi a ei a ngai dawn a ni. Kar hnih chhung chu a chawl hahdam phawt ang a, chumi hnuah inpalzam leh intauh buai awm lovin (without contact) inelna a zawm leh thei ang," tiin Manna chuan a sawi.

Napoli tana chanchin lawmawm a awm rualin, Scotland national team tan erawh match pawimawh tak takah an chhawr thei dawn lo a ni. Sebastien Pocognoli-a pawlte hian September tawp leh October thla tir lamah UEFA Nations League match li an khel dawn a - Slovenia vawi hnih an hmachhawn bakah North Macedonia leh Switzerland te vawikhat ve ve an tum dawn a ni.

DAZN nena an inbiaknaah Napoli hotu Manna hian McTominay-a contract chungchang pawh a sawi lang bawk. Kum 29 mi contract neih lai hi 2028 nipui thleng a la daih a ni.

"McTominay-a contract pawhsei chungchang maw? Scott chuan tun dinhmunah a pawtsei dawn em tih a la hriat loh thu a sawi a. Kum hnih daih contract a la nei a, keini'n pawtsei kan duh a, ani pawhin a duh bawk. Thil hi a tluang zawnga rem zung zung a har chang a awm ṭhin a, mahse kan tum mek a ni," tiin Manna chuan a sawi zui bawk.

Season thar match thum an khelh tawhah point thum hmuin, Napoli hi Serie A-ah 11-na dinhmunah an awm mek a. McTominay hian match hmasa pahnih - Genoa laka an chak ṭum leh mahni muala Como laka an tlawm ṭum khan bul a ṭan a, Thawhṭannia zaina nei tura a inbuatsaih laiin Inter Milan laka an tlawm ṭum erawh a khel ta lo a ni.