Manchester United chuan Belgium club Club Brugge striker Nicolo Tresoldi leh an left-back Joaquin Seys te chetla thlithlai turin tun kar chhung khan palai an tir niin chanchinbu hrang hrang chuan an tarlang.

Thawhlehnia Champions League inkhela Aston Villa laka Brugge 3-2 a an tlawm ṭum khan, Tresoldi hian penalty aṭangin goal a khung a. He inkhel en tur hian United aiawhte chu khelmualah an kal a, Tresoldi bakah hian kum 20 mi left-back Seys-a khelh dan pawh an lo bihchiang tel nia hriat a ni. Mahse he inkhel en tura United scout-te an kalna chhan ber hi heng player pahnihte hi an ni ngei em tih erawh a la chiang chiah lo thung.

TEAMtalk thudawn tarlangtu The Peoples Person-in a tarlan danin, United mai bakah hian Premier League club dang Tottenham Hotspur pawhin Tresoldi hi chiang taka en turin he match-ah hian an aiawh an tir ve bawk a ni. Amaherawhchu, Champions League fixture pawimawh en tura scout tirh hi club liante tan chuan thil pangngai leh an tih fo ṭhin a nih avangin, heng player pahnihte hi transfer bazar-a an lak luh tum ber an ni nghal e tihna a ni ber kher lo.

Nipui liam ta transfer bazar chhung khan Manchester United hian striker thar leh left-back thar lakluh kawng an lo ngaihtuah tawh ṭhin a. Number 9 position luah thei striker lakluh chu Joshua Zirkzee-a'n Old Trafford a chhuahsan leh chhuahsan loh chungchanga innghat a ni a, mahse transfer deadline day-a Everton-in dawrna an rawn thehluh meuh chuan a thlaktu tur zawnna hun a awm tawh loh avangin Zirkzee hian club a chhuahsan ta lo a ni. Chuvang chuan Zirkzee-a hmabak pawh a la chiang famkim lo hle.

Left-back position thuam ṭhat tumin United hian Newcastle United defender Lewis Hall chu nipui liam ta khan lak tumin an lo umzui tawh a, mahse an hlawhtling ta lo a nih kha. Chuvang chuan club recruitment staff-te chuan Luke Shaw-a thlaktu tur, hun rei zawk daih tur defender an la melh kual zel nia report a ni.

Spurs pawh he inkhelah hian an inlan ve tak avang hian, Tresoldi umzui kawngah hian elpui an awm dawn tih a tilang a. Germany Under-21 international Tresoldi hian goal khung kawngah theihna a neih ṭhat chhoh em avangin Premier League club-te mit a la chho hle a ni. Chuti chung erawh chuan, English club pahnihin an thlithlai vang ngawt hian transfer inbeihna a chhuak nghal tihna a la ni lo a, club pahnihte aṭang hian dawrna tak tak (formal bid) thehluh a la awm rih lo bawk.

United hian nipui liam ta transfer window chhung pawh khan Joaquin Seys-a chungchang hi an lo ngaihven tawh bawk a, tun ṭuma an va en leh pawh hi an thil lo chhui zui tawh sa chhunzawmna mai a nih hmel zawk a ni. United palai kalte hian Tresoldi leh Seys te hi hmuh bik tum tak taka pan nge an nih a, match an en ruala an lo assess tel mai mai tih erawh chanchin thar laiah hian chiang taka tarlan a la ni rih lo.