Manchester United academy forward kum 15 mi JJ Gabriel chuan club chhuahsan a dil tak avangin Old Trafford-ah buaina a chhuak mek. He rawlthar theihna ngah tak hi chhuahtir an duh loh avangin Man Utd neitu zinga mi Sir Jim Ratcliffe leh executive-ten a ngaihven nghal hle a ni.

Gabriel hian United-ah hming thaihmangna (de-registration) lehkha a thehlut tawh a, mahse Red Devils lam chuan a ngenna hi pawmsak an tum lo bur a, inremna kawng zawn zel an duh zawk a ni. Man Utd youth team-a che ṭha tak Gabriel hi Real Madrid bakah Barcelona, Paris Saint-Germain leh Bayern Munich te pawhin an ngaihven hle nia tarlan a ni. He chanchin hi The Athletic-a chanchinbumi Laurie Whitwell, Guillermo Rai, Mario Cortegana leh Adam Crafton te chuan September 15 khan an chhuah ṭan a ni.

The Athletic thuchhuah chuan, "Gabriel-a'n United hnenah chhuah a duh thu a thlen a, de-registration lehkha a thehlut ta mai hi thil thleng lian tak a ni. United lam chuan he ngenna hi pawmsak an tum lo hrim hrim a, chinfel dan tur kawng zawn zel an inbeisei a ni. Premier League club hian a theihna hi sang tak a ni tih an hria a, chelh zui reng an tum a ni. Co-owner Sir Jim Ratcliffe pawhin he thil hi a hria a, United executive-te pawhin Gabriel-a hi cham zui turin hmin an tum mek a ni," tiin a tarlang.

Kum 9 a nih aṭanga United zawmtu Gabriel-a contract neih lai hi nakkum nipui thleng a la daih a, mahse in lama zirna nei (homeschooled) a nih avangin tun dinhmunah scholarship emaw full-time player emaw a la ni lo. Dan ang chuan United hian kum 17 a tlin hmain professional contract an pe thei lova, kum 16 a tlin hnuaiah chauh scholarship terms an ziahpui thei thung. Gabriel hi kumin October ni 6 hian kum 16 a tling dawn a ni.

The Athletic-in a tarlan danin, a pa Joe O'Cearuill (Republic of Ireland tana vawi hnih lo inlan tawh) aṭangin Gabriel hian Irish passport a nei a, a nu lamin Cyprus chhehvel heritage an nei bawk. He European passport a neih hian kum 18 tlin hmain kum 16 a tlin rualin ram dang club-ah a insawn theihna kawng a hawnsak dawn a ni.

First team nena training lo nei tawh Gabriel hi United-in Youth League-a Sabah 5-0 a an sawp ṭum khan hat-trick a khung a, hei hi Real Madrid scout-ten uluk taka thlirin an atchilh hle a ni. Gabriel leh a chhungte hian La Liga pan hi an suangtuahna berah an ngai nia tarlan a ni bawk.

Gabriel-a'n European passport hmanga October 6-a kum 16 a tlin hnua a chhuah theih dawn leh dawn loh chungchang hi United hian an la chhuichiang mek a ni. Nilainia Carabao Cup-a Brighton an hmachhawn turah khan senior team-a inlantir mai an lo ruahman tawh a, mahse he buaina avang hian an ṭhulh leh ta zawk a, a hmakhua hi a la chiang lo takzet a ni.