Manchester United chuan Newcastle left-back Lewis Hall lakluh nan £50million vel thehchhuah an inhuam niin The Athletic chuan a tarlang a, mahse Newcastle lamin he England international hi hralh an phal loh thu an lo hrilh tak avangin he transfer hi a ṭhulh zui ta a ni. Hemi ṭum hian Hall hi kum 21 mi niin, kar leh maiah kum 22 a tling chho dawn a ni.

The Athletic-in a tarlan danin, United chief executive Omar Berrada chuan Newcastle counterpart David Hopkinson chu be pawpin he transfer chungchang hi a sawipui a, mahse Hopkinson chuan Hall hi hralh chhuah theih a nih loh thu chiang takin a lo hrilh a. United lam pawhin Newcastle dinhmun chu an pawmsak ta zawk niin tarlan a ni.

Transfer deadline day-ah khan INEOS lamin an tlar hnung veilam (left-back) hi an thuam chak ngei beisei a lo ni tawh a. Luke Shaw-a hliam neih ngun zia leh pre-season-a a khelh dan ngaihtuahin, head coach Michael Carrick-a squad-ah senior left-back rintlak chhawr tur a indaih lo hle a ni. Mahse, transfer window khar a nih hmain United hian Alejandro Balde emaw Jorge Salinas emaw te pawh an lalut thei ta lo a, Hall-a an bawhzui danah pawh hian anmahni tihsual lian tak a awm bawk a ni.

United hian tlar laili (midfield) thuam chak hmasak an thlan zawk miau avangin, Hall chungchanga Newcastle an biak meuh chuan Newcastle hian Anthony Gordon, Sandro Tonali leh Bruno Guimaraes te chu club dang hnenah an lo hralh zo hman vek tawh a. Chuti a nih tak si-ah chuan sum leh pai lamah emaw, squad din thar lehna kawngah pawh Magpies hian Hall hralh chhuah leh ngaihna an nei tawh lova. Chu mai bakah, player langsar tak tak an hralh nual tawh avangin Tyneside club ṭantute lungawi lohna ti zual thei thil tih chu an duh tawh lo bur a ni.

Thil chhinchhiah tlak tak pakhat chu, United hian left-back dang lian tham an umzui zui ta miah lo a, hei hi nakkum nipuiah Hall-a lakluh theihna kawng hawn reng an duh vang nia ngaih a ni. Nakkum nipuiah chuan he thil hi an ngaihven nawn leh beisei a ni a, Champions League khelh theihna chuan Hall-a rilru pawh a la kawi thei ngei ang tih United hian an ring bawk a ni.

Engpawh nise, engmah hi inremna puitling a la ni lo a, season an ṭan dan a fuh tawk chiah loh avangin nakkum nipuiah Carrick-a'n he indawrna hi a la kaihhruai chhunzawm dawn em tih pawh thlir zui a ngai ang. Tun dinhmunah erawh chuan, £50m man an chhiar zat hian kumin nipuiah khan United-in an left-back buaina chinfel an hnaih zia leh, an dinhmun a la hlat zia chu chiang takin a pholang a ni.