Kum hnih chhung zet an inlan tawh loh hnuah, Manchester United chuan Ningani zan hian Old Trafford-ah Azerbaijani club Sabah mikhualin Champions League chu an khel ṭan leh dawn ta a. He match zawh hnu lawk, Pathianni hian Michael Carrick-a naute chuan mahni mualah an hmelma lian Manchester City chu Manchester derby-ah an lo mikhual zui leh nghal dawn bawk a ni.

United boss Michael Carrick chuan Europe khawmualpui inelna lian bera an kir leh thei chu lawmawm a tih rualin, Ningani zana inkhelh zawha Pathiannia derby lian hmachhawn leh nghal tur chu boruak awlsam a nih loh thu a pawm a. Fixture list chu an thunun theih a nih miau loh avangin an hmaa hunbi ruahman awm chu theih tawp chhuaha an hmachhawn mai a ngai tih a sawi a ni.

The Guardian tarlan danin, Manchester City erawh chuan Thawhlehni khan khualmualah Porto an lo hmachhawn tawh avangin, Pathianni derby match hma hian United aiin chawlh hahdamna ni hnih (2 days) ngawt an nei tam zawk dawn a ni. Hei hian Ningani leh Pathianni inkar chawl tlem em em United tan fiahna lian tak a rawn thlen ngei a rinawm hle.

Premier League match thum an khelh tawhah United hian point li chiah an la hmu a, season liam ta chhung zawng khan match 40 chiah an khel thung. Chuvang chuan ram chhung inelna leh Europe inelna kal kawp chho mek hian Carrick-a squad tan hun khirh leh rit tak a rawn thlen chho dawn a ni.

Sabah nena an inhmachhawn tur hian tawn hriat inthlauh zia a pholang chiang hle bawk. Azerbaijan club Sabah hi din a nih aṭangin kum sawm pawh an la tling lo va, Europe inelna sang bera an vawikhat inlan ve na a nih laiin, United erawh kum hnih chhung an chawlh hnuah an rawn kir leh thung a ni.

Kum 2008 khan player a nih laiin Carrick hian United nena Champions League nomawi hi a lo chawi tawh a, he inelna hi club tan thil hlu leh bik tak a ni tih a sawi chhuak nghe nghe. "Champions League nomawi chawi kha ka career-a ka hlimna ber a ni a, chu tawn hriat chu neih nawn leh ngei pawh ka duh a ni," tiin a sawi. Carrick chuan United chu inelna a inlan satliah tura rawn kir an nih loh thu leh, club ṭha ber berte hmachhawn a, a thui thei ang ber thlen chu an thiltum lian ber a nih thu a sawi chiang bawk a ni.

Tun kar piah lamah pawh United game khelh tur hi a zawn chho hle dawn a. Carabao Cup quarter-final an thleng a nih ngat phei chuan, nakkum January thla laihawl hma chu kar laihawla chawlh nei miah lovin inkhel an hmachhawn chho char char a ngai dawn a ni.

Squad dinhmun lamah, United-a senior left-back rintlak awmchhun Luke Shaw chu Nilaini khan training-ah a inlan lo va, chawlh hahdamna ni khat pek belh a ni. Carrick chuan Shaw-a chawlh hi ruahmanna lawk sa a nih loh thu sawiin, Ningani hian an enfiah leh phawt tur thu a tarlang a. Sabah an hmachhawn hma hian Shaw-a dinhmun hi ngaihven hlawh berte zinga mi a ni mek a ni.