Manchester United academy striker Louie Bradbury chuan Championship club Stoke City chu a nghetin (permanent basis) a zawm fel ta. Kum 17 mi striker hian Potters-ah hian kum hnih daih professional contract a ziak a, club lam hian 2028-29 campaign thleng a contract pawhsei theihna remchang an nei bawk a ni.
Shrewsbury khuaa piang Bradbury hi Wales ram aiawhin youth level-ah a lo inlan tawh ṭhin a, United-ah hian kum li chhung hun a hmang hman a ni. Under-21 team tan match 26 a khelhah goal 10 a khung tling hman a, season liam ta khan West Bromwich Albion leh Derby County lakah goal a lo khung tawh bawk. Stoke a zawm hma ni tlemteah khan Bradbury hian Under-18 tana khelin Everton 3-0 a an sawp ṭum khan goal a khung a ni. Kumin nipui chhung khan Wales Under-19 tan inlanin Denmark leh Spain an hmachhawn ṭumte pawh khan bench aṭangin a lo lut tawh bawk a ni.
Manchester United website chuan official thuchhuah siamin, "Academy forward Louie Bradbury chuan Championship side Stoke City zawm turin inremna a siam fel ta. Shrewsbury tlangval striker hian Under-14 level-ah United a zawm a, kum 2025 khan club-ah scholarship a hmu zui a ni. 2024-25 season chhung khan Under-18 tan vawi nga a inlan a, FA Youth Cup fourth-round match-ah khan Adam Lawrence-a naute tan late substitute-in a debut match a khel a ni. Season liam ta khan Under-18 Premier League-ah goal riat a khung bakah Premier League 2-ah pawh a inlan a ni. Manchester United-a mi zawng zawng chuan Louie hi a career hmabakah duhsakna sang ber kan hlan e," tiin an tarlang.
Stoke City academy director Jack Higgins chuan club website hnenah Bradbury an lakluh theih avanga a hlim thu sawiin, "Louie hi kan club-a kan lakluh theih avangin kan hlim hle a, kan U18 leh U21 squad-a striker phurawm tak tak kan neih mekte a rawn belhchhah dawn a ni. Louie hian kum engemaw zat chhung Manchester United-a tawnhriat ropui tak tak a neih hnuah, hma a sawn chhoh zel theih nan leh kan hmun boruaka a ṭhanlen theih nan kum inhmeh takah min rawn fin a ni. Player kan lak apianga kan tih ṭhin angin, an khelh dan phung aṭanga an chanchin hrim hrim, an technical theihna leh taksa chak dan thlengin kan thlithlai uluk hle ṭhin a; Andrew Frost (Head of Academy Recruitment) leh Muheez Muyi-Opaleye (Academy Recruitment Coordinator) te chu Louie lakluh kawnga an thawhrimnaah lawmthu ka hrilh a ni," a ti.
Bradbury hi United academy chhuahsantu rawlthar hnuhnung ber a ni chho mek a; a hmain Gabriele Biancheri chuan club hi chhuahsanin Austrian second division club FC Wacker Innsbruck a lo zawm tawh a nih kha. Kumin nipui transfer window inhawng chhung khan United chuan an full-back Habeeb Ogunneye leh winger James Scanlon te chu Arsenal panin an chhuahtir tawh bawk a ni. United hian Leicester City rawlthar theihna ngah Louis Page chu lakluh tumin theih tawp chhuah mah se, club hnihte an inrem theih tak loh avangin he rawlthar hian League One club hi a la chamchilh rih a ni.
