Manchester United chuan an defensive starlet, tlarhnung venhim lama theihna nei ṭha tak James Overy chu Australia rama club lian Sydney FC zawm turin a nghetin (permanent transfer) an kaltir fel ta tih official thuchhuah siamin an nemnghet ta.

He inremna chungchangah hian Manchester United chuan thuchhuah siamin, he tlarhnung player naupang hian Sydney FC hi a nghetin a zawm fel tawh tih an tarlang a ni. Overy tan hian a ram Australia lama kir lehna hun ṭha a ni a, United tana hun eng emaw chen a hman hnuah an ram khelmual lamah chona thar hmachhawn turin a let leh ta a ni.

Perth khaw chhuak James Overy hi kum 2024 khan Manchester United chuan an lo la lut a ni. Club scout-te chuan a theihna an hmuh khan an duh em em a, khelmuala a chet dan leh a tlarhnung venhim theihna sang tak avanga United scout-te a hip em avangin Old Trafford lam hian an hnena seng lut turin hma an lo la ta a nih kha.

Kum 2024-a Old Trafford a thlen hnu aṭangin Overy hian hmasawn zel tumin theih tawp a chhuah chho ṭhin a. Mahse, player naupang tan club lian bera first team-a khelhna hmun chang tura inelna a nasat ṭhin em avangin, a theihna tipung tura khelmuala hun tam zawk a hmuh theih nan Sydney FC lama a ngheta kir leh hi a tan leh club tana thutlukna ṭha ber nia ngaih a ni ta a ni.

Overy hi Australia national team set-up huang chhungah pawh lo awm tawh ṭhin a ni a, ram aiawh thei tura theihna nei ṭha zinga ngaih a ni chho bawk. Amaherawhchu, kumin nipuia World Cup inelna neih mekah khan Australia squad zingah erawh thlan a ni ta lo thung a ni.

A ram tana World Cup khel tur squad-ah thlan ni lo mah se, Australia national team huangchhunga a lo tel ve tawh ṭhinna hian a theihna a sang tawk hle tih a tarlang a. Sydney FC a zawm takah hian khelmualah inlan tam theihna hun remchang a hmuh ngei beisei a ni a, Australia khelmual lamah a theihna pholang zui zelin a career-ah hma a sawn chhoh zel beisei a ni.