Transfer deadline day khan Manchester United chuan Leicester City midfielder kum 18 mi Louis Page chu lakluh tumin theih tawp chhuah mah se, sum chungchangah an inrem theih tak loh avangin an indawrna chu a ṭhulh ta a. Mahse, transfer window a inhawng leh a nih veleh United hian he rawlthar lakluh tumin hma an la ṭha leh ngei dawn nia report a ni.

Deadline day khan United hian Page hi lakluh thut tumin hma an la a, mahse Leicester-in a man atana an phut zat chu an tan harsatna lian tak a nih tak avangin he inleina hi a puitling thei ta lo a ni. Deadline day hma kar eng emaw zat aṭang tawh khan United hian he player hi an lo ngaihven tawh a ni.

The Athletic journalist Laurie Whitwell-a tarlan danin, transfer khar niah United chuan Page-a chungchangah inbiakna an hawng ṭha leh a, inremna neih theih mai dinhmun an thleng hman hial a ni. A tirah a man hi £10m chuang tura chhiar niin United pawhin hei hi an ngaihtuah zui a, mahse Leicester-in a tirah £12m bakah a chet ṭhat dan azira pek belh tur (add-ons) £3m, a vaia £15m lai an phut tak tlat avangin club pahnihte inbiakna hi a tawp ta rih a ni.

He inbiakna a tawp hnu hian, League One match-a Plymouth Argyle an mikhual ṭumin Leicester manager Russell Martin chuan Page hi starting lineup-ah a luhtir nghal a, hei hian tun ṭum atan chuan inbiakna a tawp chiang hle tih a tilang a ni.

Kumin tir lam pawh khan Page hian Arsenal-in lakluh an duh thu an thlen pawh a lo hnawlsak tawh a, Old Trafford pan ngei a rilruk tlat zawk a ni. He rawlthar rilru puthmang hian, nakina inbiakna neih leh a nih hunah pawh Leicester-in a man tihtlawm an tum lo a nih pawhin, United chu dinhmun ṭha zawkah a dah ngei beisei a ni.

Whitwell-a tarlan danin Plymouth lakah hian Page hi a khel ṭha hle a. United hian January thlasik transfer bazar-ah emaw, nakkum nipui bazarah emaw lakluh tumin hma an lak ṭhat leh ngei a beiseiawm a ni. United-in an rawlthar lakluh dangte loan-a an chhuah zui tir ṭhin ang hian, thlasik bazarah Page hi lalutin Leicester lamah hian loan-a chhuahtir zui leh theihna turin inremna duan a nih chuan United tan transfer kalpui zung zung nan a ṭangkai hle maithei bawk a ni.