Nipui transfer window a khar tak hnuah, Manchester United chuan Premier League lamah an rilru an pe ṭan leh dawn ta a. Pathianni hian Michael Carrick-a naute chuan Everton an hmachhawn dawn a, an mualah a zawnin league hnehna lak ngei an tum ang.
Kumin nipui chhung khan United hian midfielder pathum lai an lalut a, mahse an lak thar Carlos Baleba erawh kerek hliam aṭanga a la damchian loh avangin Toffees lakah hian a la inlan thei dawn rih lo a ni. Carrick hian tlar lailiah thlan tur player tam tak la nei mah se, left-back dinhmunah erawh squad chhah tawk an nei lo hle thung.
Kumin nipui chhung khan United hian Newcastle left-back Lewis Hall chu lakluh tumin an lo ngaihven hle a, mahse inremna an siam thei ta lo a ni. Hei hian Luke Shaw chu elpui mumal nei lovin a dah a, Carrick-a'n Patrick Dorgu chu tlarhma hnaih zawka a chhawr zawk avang leh inelna hrang hranga an inlan dawn avangin Shaw-a phurrit hi a sang hle dawn a ni.
United defender hlui leh club legend Wes Brown chuan Hall an la lo chu Manchester United hian an tisual a nih a rin thu a sawichhuak a ni. Kum 21 mi Hall hi Arsenal defender Myles Lewis-Skelly leh Barcelona ace Alejandro Balde te nen Old Trafford pan thei tura sawizawm an lo ni tawh ṭhin a. Newcastle chuan Hall man atan hian £75million lai an chhiar nia tarlan a ni a, a tawpah St. James' Park-ah a cham zui ta nge nge a ni.
Brown chuan Oddschecker hnenah sawiin, "Lewis Hall hi theihna nei ṭha tak tak a ni tih a chiang reng mai. A la naupang a, United hian lalut ta se an squad nena inmil tur tak a ni chiang a ni. Chuvangin keichuan a man hi thehchhuah mai pawh ka inhuam ang. An tana player inhmeh tak tur a ni a. Luke Shaw hi player ṭha chungchuang tak a la ni reng a, mahse a hliam neih fo ṭhin dan erawh ngaihṭhatlohna awm reng a ni," tiin a sawi.
Season liam ta khan kum 31 mi Shaw hian United league match 38 khelhah a inlan vek a, mahse hun kal tawhah hliam vangin hun rei tak tak a lo chawl tawh ṭhin a ni. Champions League-a an kir leh tak bawk si avangin he defender upa lam hian chawlh hahdamna hun a nei tlem dawn hle a, squad-ah hian rawlthar Harry Amass chiah left-back dang awmchhun a ni rih a ni.
Hemi rual hian United academy striker Louie Bradbury chuan permanent transfer hmangin Stoke City a zawm fel ta bawk. Kum 17 mi, Wales U19 international hian kum hnih daih contract ziakin, kum khat dang pawhsei theihna a tel bawk a, Stoke youth academy lam a zawm dawn a ni.
Bradbury hian season liam ta khan United U18 leh U21 tan match 24 a khelhah goal 10 a khung a, thla liam taa Everton U18 laka 3-0 a an chak ṭum pawh khan goal a khung hman a ni. Transfer an puanzar hnuah Stoke academy director Jack Higgins chuan, "Louie kan lalut thei hi kan hlim hle a, kan U18 leh U21 squad-a striker phurawm tak tak kan neih mekte a rawn belhchhah dawn a ni. Manchester United-a kum eng emaw zat chhung tawn hriat ṭha tak tak a neih hnuah, kan hnuaia rawn ṭhang lian chho turin hun ṭha tak a nei a ni," tiin a sawi.
