Kumin nipui chhung khan Manchester United Women chuan kum 2021 aṭanga lo enkawl tawhtu manager Marc Skinner chu an chhuahtir a, hei hi thutlukna lian tak a ni. English manager Skinner-a hnuaiah hian United Women hian kum 2024 khan FA Cup nomawi chawiin an trophy hmasaber an lo la tawh a, season liam ta khan an vawikhatna atan Champions League-ah inlanin quarter-final an lo thleng tawh bawk a nih kha.

Thla hmasa tir lam khan Spaniard Eva Olid chu head coach thar atan ruat a ni a. 'Inside Carrington' episode tharah Manchester United Women Director of Sport Matt Johnston chuan he thutlukna an siam chhan hi a sawifiah a ni.

Skinner-a chhuah chungchang sawiin Johnston chuan, "A hmasa berin Marc-a chungah lawmthu ka sawi duh a ni. Manchester United-ah hian hun ropui tak tak a hmang a, a rawn luh tirh aiin club hi dinhmun ṭha zawka a dah theih nan a pui a, chuvang chuan a lakah lawmthu kan sawi a ngai a ni," tiin a sawi.

Chutih rualin Johnston chuan club-in kawng thar zawh an mamawh tawh thu sawiin, "Hlawhtlinna chanpui thei reng chunga player naupangte chher hriam theitu — la naupang, ngaihtuahna thar nei leh kan club hlutna (values) nen inmil mi kan mamawh a ni," tiin a sawi chhunzawm a ni.

He Spanish coach hian Scottish club Heart of Midlothian-ah hetiang hna hi hlawhtling takin a lo thawk tawh a, Johnston chuan an ruat chhan sawi zuiin, "Eva kan hmuh khan min hnehin min tiphur takzet a ni. Mi hipna ngah tak (charismatic) a ni bawk a, kan tan chuan thil ropui tak a ni. Club hlutna nena inmil bakah, kan kal duhna strategic direction nen tak inmil coach a ni," tiin a sawi.

United Women fan-ten khelmuala an hmuh tur football khelh dan phung (style) chungchang sawifiah zelin Johnston chuan, "A football kalphung chu ball chan hnem, inkhel thunun leh hmunawl remchang hman ṭangkai a ni. Eva-i'n hmeichhe ho hnena a hman ngun em em tur ṭawngkam chu 'tum mumal tak nei chunga khelh' (play with intent) tih hi a ni. Hmalamah rang takin kan kal thei em? Mual chhunga hmunawl awmte hi a tam thei ang ber kan hmang ṭangkai thei em? A chhan chu goal khung a, fan-te tihhlim hi kan duh a ni," tiin a sawi bawk.

Director of Football Operations Ameesh Manek pawhin United Women hi squad naupang tak, kum 10 pawh la tling lo an nih thu tarlangin, Olid-i lakluh hi he kalphung nen hian a inmil chiah tih a tarlang.

Manek chuan, "Eva hian amateur programme aṭanga hun reilote chhunga champion-a chhuah theihna sulhnu ṭha tak a lo nei tawh a ni. Kan ngaihtuah zinga midang zawng aiin Eva-i tilangsar tu ber chu a football philosophy, rilru puthmang, ze nghet leh hlutna te nena kan inmil em emna hi a ni," a ti.

Manchester United Women hian Pathianni lo thleng tur hian Progress with Unity Stadium-ah Chelsea an hmachhawn leh dawn a ni.