Match thum khelh tawha vawi khat chauh hnehna an la chan avangin, Manchester United chuan tun season bul an ṭan ṭha tawk lo hle. International break a thlen hmain inelna hrang hrangah match li ngawt khelh tur an la nei a, head coach Michael Carrick tan chuan a squad a herrem (rotate) dawn nge player ngai a chhawr chhunzawm dawn tih chu thutlukna siam a harsa hle a ni. Old Trafford club-ah hian an man belhkhawm £200m chuang ni si, tun season-a khelmuala la inlan miah lo first-team player pariat ngawt an awm a, chung player-te dinhmun chu hetiang hi a ni:

Mason Mount & Joshua Zirkzee:

Mount-a tan chuan tun season hi a la inṭan meuh lo a ni. Pre-season-ah theihna pholang viau mah se, hliamin a tlakbuak leh a. Everton laka 1-1 a an inhnehtawk ṭum khan a vawi khat nan bench-ah a ṭhu ve hman a, mahse khelmualah luhtir a ni lo. Kar hnih chhung hian £55m man midfielder hi khelmualah hmuh theih beisei a ni a, first choice ni pha kher lo mah se squad player tangkai tak a ni thei a ni. Joshua Zirkzee pawh Everton nena an inkhelh ṭuma hmun chang lo zinga mi a ni a. Transfer deadline day-a Toffees (Everton) zawm a tumna chu club lamin an dan hnuah, Everton lakah hian substitute-ah dah niin luhtir a ni ta chuang lo. Tun season match thum khelh tawhah bench-a ṭhu vek si, minute khat pawh la khel lo outfield player awmchhun a ni mek.

Harry Amass & Karl Darlow:

Harry Amass hi matchday squad-ah a la inlan ve lo a, mahse kar thara Carabao Cup khelh turah hian hun ṭha a hmu maithei a ni. Amass hi left-back-ah Luke Shaw-a thlaktu tura ngaih niin, under-21 leh pre-season-ah a che ṭha hle a, Championship-a loan-a a lo khelh tawhna khan tawnhriat ṭha a pe bawk. Goalkeeper thar Karl Darlow erawh hliam emaw hremna vanga harsatna a awm thulha emergency cover atana lak a nih avangin a la inlan loh hi a awm hle a. Carrick-a'n team a thlak danglam dan azirin, kar thara Carabao Cup-ah a debut a siam maithei a ni.

Shea Lacey & Amad:

Pre-season-a United player langsar Shea Lacey hi rawn kaisang thar tur zinga beisei a ni a, mahse khelmual a la rap lo. Match hmasa pahnihah bench-ah a ṭhu a, kar tawpah Mount-a a lo let tak avangin a hmun a kian a ni. Champions League-ah squad a zawm leh beisei a ni a, international break hmaa inlan ngei tura beisei a ni bawk. Amad erawh season inṭan dawn chiah tuka a inhliam avangin United hian an chhawr thei lo a, an tuar hle. Club lamin a dinhmun chungchang official thuchhuah an la siam lo na a, kar tawpa Manchester Derby inkhel turah hian inlan theih tumin a bei mek nia report a ni a, a lo kir a nih chuan team tan phurna lian tak a ni ang.

Carlos Baleba & Matthijs de Ligt:

£66m senga an lak thar Carlos Baleba hi hliam nei chunga Carrington thleng a nih avangin, international break hma chuan a inkhelh theih a rinawm loh a. October thla tir lamah a inpeih beisei niin, tun ṭum Cameroon international squad-ah pawh a hming a tel lo a ni. Matthijs de Ligt pawh a hnungzang hliam vanga zai a nih hnuah first-team training a zawm leh tawh a. Baleba ang bawkin Dutchman hi international break hma chuan a inkhelh a beiseiawm loh a, mahse a dam chian hunah chuan United tlarhnung buai mek tan puihna lian tak a ni dawn a ni.