Manchester United-in kumin nipui chhung khan an midfield thuamchak tura thapui an thawh hnuah pawh, Michael Carrick-a squad-a midfielder zingah Kobbie Mainoo chu a langsar ber a ni chho mek a, Premier League huangah pawh theihna sang ber pho chhuaktu zinga mi a ni ta hial.
Everton nena an inkhelh ṭum khan Mainoo hi a khel ṭha em em a, ball an chan lai leh an chan loh lai pawhin khelmualah a hmuhnawm hle. He match-ah hian Bryan Mbeumo-a goal hmasa ber tur siamsakin (assist neiin), tun season-a a goal contribution hmasa ber a nei nghal a ni.
Kumin nipui transfer bazar inhawng chhung khan United-in tlar laili thuamchak nana an lakluh tum ber zinga mi chu Elliot Anderson a ni a, a dawtah Mateus Fernandes a awm bawk. Mahse heng player pahnihte hi an chang zo ta lo ve ve a; chutiang a nih lai chuan Mainoo hian Premier League tualzawlah an aia a ṭhat zawkzia a rawn pholang mek a ni.
Kumin nipuia World Cup an khelh ṭum khan England squad lamah Mainoo hi hlamchhiah niin an chhawr tam lo hle a. Chu chuan amahah phurna thar siamin, 2026-27 season hi a theihna pholang ngei tura inpeih atin a rawn ṭan a nih hmel hle.
Statman Dave-in X (Twitter)-a a tarlan danin, Mainoo hian tun season Premier League-ah minute 90 chhung zela ball chhuhsak (possession won) nei hnem ber nihna a hauh mek a ni. Chhut dan dik takah chuan league match chhungin minute 90 zelah vawi 10.11 lai ball a chhuhsak ziah a, hei hian tlar hnung venhim lamah hma a sawn zia a tilang chiang hle.
United-in Anderson an lo ngaihven em em chhan kha chu mimal innuaina leh ball inchuhnaah (duelling ability) a thiam em vang a ni a; mahse tun season-ah hian Mainoo chuan chu thilah kher kher pawh league chhunga a berte zinga mi a nih theihzia a rawn finfiah chho mek a ni.
Season liam ta khan Carrick-a hnuaiah Mainoo hi a rawn che ṭha chho hle a, starting XI-ah a hmun ngai a rawn luah let leh tawh a nih kha. Tunah hian kum 21 mi niin, United squad chhungah pawh senior player dinhmun a rawn hauh chho mek bawk.
Kumin nipui chhungin United chuan Youri Tielemans, Andrey Santos leh Carlos Baleba te lalut mah se, midfield lailia Carrick-a'n a ngaihpawimawh hmasak ber chu Mainoo tho hi a la ni reng a ni. Mainoo leh Tielemans te inkawpna hian hmalam a pan chho hle a, khelmualah an inman dun ṭan hle bawk. Amaherawhchu, Europe inelna lam nen match a tam chhoh dawn avangin Carrick hian player-te hi uluk taka an dinhmun a inthlaktir (rotate) a ngai chho dawn a ni.
