Manchester United chuan an academy thuam chak nan an elpui lian Manchester City academy aṭangin midfielder kum 16 mi pahnih Karim Cassim leh David Eze te an lalut fel ta.

Red Devils hian Manchester City academy-a theihna ngah tak Karim Cassim leh David Eze te hi an lalut a, khawvel football-a talent ṭha tak tak inchuhna kal zelah an rival club pui aṭangin hetiang hian academy player pawimawh an la lut a ni. Cassim leh Eze te hi Manchester United academy tana player pawimawh tak ni tura beisei an ni.

City aṭanga academy player pahnih an lakluh bakah hian, Manchester United chuan Leicester City aṭangin kum 18 mi midfielder talent ṭha tak Louis Page lakluh pawh an lo tum tawh a. Transfer window khar niah khan a man tur chungchangah club pahnihte hi an inrem theih tak loh avangin, he transfer hi puitling lo mah se, Red Devils hian January transfer window inhawng leh aṭangin Page-a lakluh tumna hi an chhunzawm leh beisei a ni.

Louis Page hi chawlhkar riat (8) liam ta khan kum 18 tling chauh ni mah se, season liam ta khan Leicester City tan vawi 21 ngawt mai a inlan hman a ni. Leicester midfielder Page hi Old Trafford pan hi a chak hle nia tarlan a ni a, United hian deadline day hma khan inbiakna an kalpui nasat hle chungin a man turah an inrem thei ta lo a ni.

United hian an youth system tihchangtlun zui zel an tum hle a, Cassim leh Eze te lakluh a nih bakah hian, Manchester United naupang mi 15 ten club nen scholarship contract hmasaber an ziak fel bawk a ni. Old Trafford club hian rawlthar theihna ngah tak tak lakkhawm leh an academy aṭanga player puitling ṭha zawk chher chhuah zel hi an ngaihpawimawh ber pakhat a ni zel dawn tih a lang chiang hle.