Kar tawp liam ta khan kum 18 mi striker Chido Obi chuan Dutch club Willem II tan a match hmasaber khelin, bench aṭangin inkhelh zawh nan minute riat chiah a awm tawhin a rawn lut a. Arsenal academy aṭanga kum hnih liam taa Manchester United a zawm laia chanchinbu hmai luah hneh em em rawlthar tan chuan, hetiang boruak hnuaia tualchhung inkhel a rawn hmachhawn ṭan hi thil danglam tak a ni.
Arsenal academy-a a awm lai khan Obi hian khingpui tlarhnung a pawt darh hneh thei hle a, United-in an la lut thei kha thudawnnate chuan thil ropui leh hlawhtlinna lian tak ("genuine coup") tiin an lo sawi hial a ni. Europe club lian dangte ngaihvenna karah United chuan Manchester pan turin an thlem thlu thei a, club-a a season hmasaberah pawh a che ṭha hle. 2024-25 season khan youth match 19 a khelhah goal 16 ngawt a thun a, academy huangah chuan hlauhawm tak a ni. First team-ah pawh a inlan ve zeuh zeuh a, theihna ṭha tak a neih rualin puitling inkhel hmachhawn tur chuan tawn hriat a la nei tlem tih a lang chiang hle bawk.
Manager hlui Ruben Amorim pawhin player an indaih loh avanga first-team lama Obi an chhawr hma lutuk thu a lo pawm tawh a. Hmasawnna ṭha zawk a neih theih nan season liam ta chhung zawng khan academy inkhelah chauh chhawr a ni zui ta a ni. Obi-a tana chona lian ber chu ball a chan loh laia a chet dan (off-the-ball work) siamṭhat a ni a. February thlaa Manchester City U18 an hmachhawn hnu khan coach-te pawhin hemi kawngah hian hma a sawn nasa hle tih an pawm tlang a ni.
Mahse hetianga hma a sawn chung pawhin, kumin nipui pre-season-ah khan head coach Michael Carrick chuan first-team inkhelah hunṭha a pe zui ta lo. Norway khawpui Trondheim-a Rosenborg an hmachhawn ṭum khan inlan mah se, pre-season friendly dangah a telh zui ta lo a; hei hian loan-a a chhuah a ngai dawn tih a tilang chiang a, British transfer deadline pelh hnu khan Netherlands club Willem II chuan loan-in an lalut ta a ni.
Willem II-a a luh hnu hian an technical director Freek Heerkens chuan Obi chungchang sawiin, "Chido hi striker naupang theihna ngah tak a ni a, a thang chhoh zelna tur kawngah hun pawimawh tak a hmachhawn mek a ni. Kum engemaw zat chhung chu Manchester United-a infiamna boruak sang tak hnuaiah a lo inenkawl chho tawh a, tunah chuan tawn hriat neih a chak tawh hle. Chumi kawngah chuan kan pui thei ang a, Eredivisie hi a theihna phochhuah nana hmun ṭha tak a ni. Chutih rualin, ani ang striker theihna nei ṭha kan lakluh theih avang hian kan squad tan pawh hlutna thar a rawn thlen dawn a ni," a ti.
Manchester Evening News chuan April thla khan he striker naupang tana a kal lehna tur atan Netherlands league (Eredivisie) chu a inrem ber tur thu an lo ziak tawh a. England rama league hniam zawk Championship vela chhuahtir chu tha leh tha innuaina league khirh tak a nih avangin Obi-a tana thil fuh ber a ni kher lo ang. Senior football-a inkhelhna hmun pe thei tur leh a theihna phochhuah theihna hmun Willem II-a a chet dan tur hi thil nghahhlelhawm tak a ni. Borussia Dortmund aṭangin Alexander Isak pawhin Willem II-ah hian loan-in hun a lo hmang tawh a; Obi hi kum khat hnuah Isak-a ang chiah a rawn nih nghal beisei ni chiah lo mah se, United-a a hma hun tur atan erawh theih tawpa a beih a ngai thung ang.
Academy inkhela a inlan lai khan Obi hian coach-te aṭangin kaihhruaina a mamawh reng ṭhin a, sideline aṭanga coach-ten a hming an auh nasat theih em avangin fiamthu thawhnan hial an hmang tawh ṭhin. Season liam ta tawp lama U21 boss Adam Lawrence-a'n a sawi dan chuan, chutianga "Chido!" tia an auh fo ṭhinna chhan chu amaha rinna an nghah tlat vang leh hmasawn tura an nawrna vang a ni. Mahse tunah chuan Dutch league-ah hian senior football-ah goal a khung thei tih amahin a pholan a ngai ve thung tawh dawn a ni. Youth level-a a sanna leh taksa lenna hmanga midang a ngam ṭhinna piah lamah hian hmasawn zel dan a zawn a ngai ta. He loan hun a zawh meuh chuan Manchester United hian nakin hun atan striker rintlak an nei dawn nge dawn lo tih chu an hrethiam tawh ngei ang.
