Zanin hian Azerbaijan club Sabah FK player-te tan chuan Old Trafford khelmuala han rah chu a vawikhatna tur a ni a, mahse an head coach Valdas Dambrauskas tan erawh a hun kal tawh nena inzawmna ropui tak a ni thung. Kum 22 liam ta khan, Manchester United Soccer Schools-a coaching hna thawk tura interview a neih ṭumin he khelmual thlirtu executive box-ah hian a lo ṭhu tawh a ni.
Dambrauskas hian kum 2002 khan Lithuania rama 'Who Wants To Be A Millionaire?' inelnaah litas 4,000 a man a, khami hun laia thla ruk hlawh tlukpui he a sum dawn hi football coach nih a suangtuahna tihlawhtling turin a hmang a ni. Kum 25 mi a nihin London-ah a insawn a, community project leh semi-professional club-ah te bakah Fulham leh Brentford youth programme-ah te coach hna a thawk kual a. Kum 2004 khan London Metropolitan University-ah sports science leh coaching a zir zui bawk a ni.
Mahse a tana kawngkhar lian ber hawngtu chu United-a a hna hmuh kha a ni a. He hnaah hian kum nga chhung hun hmangin, residential camp-a ram hrang hrang aṭanga lo kal player-te a enkawl a, player hmasawnna kawngte thlithlaiin Switzerland rama club Soccer Schools programme te a aiawh ṭhin a ni.
BBC Sport hnenah Dambrauskas chuan, "Kha kha ka nuna thil thleng ṭha ber a ni. Interview vawi thum emaw vawi li emaw ka paltlang a. Tawnhriat nei lo chung pawha he hunṭha min petu John Shiels-a lakah hian ka lawm reng tawh ang. Manchester United Soccer Schools-a mi ropui tak tak ka tawh ang kha khawiah mah ka la tawng ngai lo," tiin a sawi.
Shiels hi kumin nipui khan Manchester United Foundation chief executive aṭangin a chawl a, tunah hian Dubai-ah a khawsa mek a ni. Ani hi Dambrauskas-a hnena club soccer school-a hna petu kha a ni a, he Lithuanian pa hi a la theihnghilh lova, a hnu zela a hmasawnna pawh a chhui zui reng a ni.
Manchester Evening News hnenah tun kar khan Shiels chuan, "Mipa fel tak a ni a, thil zir a chak em em a ni. Hnathawk rim thei tak niin a tan engmah a harsa lo a, mize ṭha tak a pu bawk. Soccer school-a lo kal ṭhin ka fate pawhin Valdas hi an la hre reng a ni. Naupangten inkhelh paha nuam an tih theihna tura ruahmanna awmna soccer school tihdan phung nen khan a inmil thlap a ni," tiin a sawi. Shiels chuan sawi zawmin, "Khami hnu aṭang khan Facebook-ah ka chhui zui reng a, hetiang dinhmun thleng tur hian a thawkrim chhunzawm zel a ni. Champions League-ah khingpui coach anga a rawn let leh thei hi thil ropui tak a ni a, a phu hliah hliah a ni," a ti bawk.
Kum 2014 khan Dambrauskas hian Lithuania club FK Ekranas-ah club coach hna a chelh ṭan a, hemi kum vek hian FK Zalgiris Vilnius a zawm leh a ni. Hemi hnu hian hmun hrang hrangah zinin Latvia, Croatia, Bulgaria, Greece, Cyprus leh Azerbaijan-ah te hna a thawk a, ram pali (4) laiah champion nomawi a chawi tawh a ni.
Heng zingah hian kum liam taa Azerbaijan rama nomawi a lakpui pawh a tel a. Kum 9 kalta leka din Sabah chu kum 49 mi hian Champions League league phase-ah a luhpui ta hial a ni. He inelna thleng tur hian Wales, Denmark leh Finland ram club-te an hneh a, final qualifying round-ah Hapoel Be'er Sheva an hmachhawn a ni. Sabah hi an tla mai dawn emaw tih hnuah minute 94-naa goal an khungin extra time an khelh phah a, hetah hian goal hnih khung lehin tournament puitlingah an lut a, Old Trafford-a an debut match khel turin an rawn thleng ta a ni.
Old Trafford-a a kir leh tur chungchangah Dambrauskas chuan, "Hei hi chu ka suangtuahna bak a ni. Kha tunnel aṭanga khelmuala luh chhuah leh tur chu. Naupangte hruaiin Old Trafford-ah hian vawi tam tak ka lo kal tawh ṭhin a, tunah chuan coach puitling niin ka rawn kal dawn ta a ni," tiin a sawi.
