Manchester United chuan an manager Michael Carrick-a hnuaiah danglamna lian tak an kalpui ṭan a, hei hi an club enkawltu hlui Erik ten Hag leh Ruben Amorim-te hun laia an lo kalpui ṭhin dan phung kalhsan hlawkna a ni ta.

Chanchinbu lian Daily Mail-in a tarlan dan chuan, United youth team hrang hrangte chuan Michael Carrick leh a coaching staff-te'n first-team level-a an hman mek tactics leh formation chu an entawn (mimic) vek tawh dawn a ni. He ruahmanna thar hian academy aṭanga senior team thlengin inkhelh dan phung inang tlang leh nghet zawk neihpui a tum a ni.

He kalphung thar hi manager hlui ten Hag leh Ruben Amorim-te hun laia thil thleng ngai lo leh an tih ṭhin dan nena inpersan hlawk a tling a. Anni pahnih hun lai khan first-team leh youth team-te khelh dan leh an formation hman danah inthlauhna leh inmil lohna a awm fo ṭhin a ni. Tunah erawh chuan Carrick leh a thawhpuite ruahmanna angin, first team-in khelmuala tactics an hman ang chiah chu naupang lam team-te pawhin an zawm ve nghal dawn ta a ni.

He thutlukna hian United-ah nghawng lian tak a neih beisei a ni a, youth level aṭanga first-team-a player naupangte an rawn inhlangkai hunah pawh, senior team tactical system leh formation hman mek chu lo hriatbel sa vek an nih tawh dawn avangin insiamrem a awlsam phah hle dawn a ni.

Carrick-a hnuaiah Manchester United chuan hma an la chho mek zel a, Erik ten Hag leh Ruben Amorim-te kalsan hnuah club pumpuia inkhelh dan phung inlungrual leh inmil thlap nei tura an hmalakna hian United chhungrila inrelbawlna thar a pholang chiang hle a ni.