Manchester United forward hlui Anthony Martial chuan Everton a zawm theihna kawng a inhawng maithei niin chanchinbu lamah tarlan a ni a. He thil hi Everton manager David Moyes-a'n transfer bazar-a an hmalak dan tur chungchang a sawichhuah hnuah ngaihven a hlawh zual hle a ni.

French forward Anthony Martial hi tun dinhmunah club nei lovin a awm mek a, June thla liam ta khan Mexican Liga MX side C.F. Monterrey nen inrem takin an inṭhen fel a ni.

Martial hian Mexico lama a hun hman chhungin harsatna a tawk nasa hle a. February 2026 khan a dar ruh a sawh pelh (dislocated shoulder) a, hemi hnu hian Monterrey manager Nicolas Sanchez nen disciplinary chungchangah inbakkaih zuiin training neih pawh khapsak hial a ni bawk a nih kha.

Heng thil thleng zozai avang hian, club lam leh he French forward te hi inrem taka inṭhen a, club chhuahsan mai loh chu thlan tur kawng dang an nei ta lo a ni.

Old Trafford-a a hun hman laia United fans-te ngainat em em Martial hian khelmualah a career tih nuntharna hunṭha a zawng mek a. David Moyes-a'n transfer window-a hma lak an tum dan a sawi chhuah takah chuan, Goodison Park club hian he striker hi lakluh tumin hma an la zui dawn em tih chu transfer bazar khar hmain a chiang chho tura ngaih a ni.