Manchester United manager Michael Carrick chuan match thum a zawnin Kobbie Mainoo leh Youri Tielemans te chu midfield-ah bul a ṭantir a, he player pahnihte inrem leh inman ṭha chho ta em em chu a lawm hle tih a sawi.

Champions League match hmasa bera Sabah an hmachhawn ṭum hian, United-in first-half ah 3-0 a hma an hruai theih nan tlar lailia Mainoo leh Tielemans-te inkawp hian hmun pawimawh tak a luah a. Hetianga hma an hruai tak avang hian Carrick chuan second-half ah Tielemans chu hahchawlhtirin, tun season-a a vawi khat nan Mason Mount chu minute a pe ve ta a ni.

Second-half chawhnu lamah Carrick hian academy chhuak Mainoo pawh hahchawlhtir ve lehin, a aiah Andrey Santos a luhtir bawk a. Tlar laili thar an neihah hian thlan tur ṭha tak tak nei mah se, Carrick-a tan erawh bul ṭantu tur hmasa ber chu a chiang chho tial tial niin a lang.

Midfield chungchang sawiin Carrick chuan, "Zaninah kan midfielder palite khan khelh dan ngai rengin theihna an pholang vek a ni. Mason leh Andrey te an rawn lut a; Mason-a'n hun reilote a chawlh hnuah khelmual a rawn rah leh theih kha thil lawmawm tak a ni a, Andrey pawh a rawn inlungrual nghal thlap a ni," a ti.

"Kobbie leh Youri te hian minute an khel tam zawk a, an inman chhoh zia pawh a hmuh theih vek a ni. Youri hi a rawn inhmang nghal hle a, zaninah pawh a che ṭha leh hle mai. Kobbie lah hi a che ṭha tluan parh reng mai a, chuvang chuan thlan tur ṭha tak tak kan nei a ni. Kan mamawh huna kan chhawr theih tur hetianga an inman ṭha tlang vek hi hmuh a nuam hle," tiin Carrick chuan a sawi belh bawk.

Midfield lamin hnehna ropui tak chang tura remruatna an siam ṭhat laiin, tlarhma lam pawhin goal an khung chhunzawm reng a. Tun season-a a vawikhat nan Benjamin Sesko chuan bul a ṭan a, match hnih a zawnin goal a khung nghal a ni. Season liam ta tawp lama a chawn ruh hliam (shin injury) avangin pre-season khel thei lo he Slovenian striker hi fimkhur taka enkawl a ni a, season liam ta chanve hnuhnung lama Carrick-a hnuaia a theihna ropui tak ang kha a rawn nei let ṭan leh mek a ni.

Sesko chungchang sawiin Carrick chuan, "Ani hi chuan tumpuite tan hlauhawm danglam bik a thlen thei a ni. Ben-a theihna leh min pek theih kan hriatchian hi a lawmawmna lai tak chu a ni," a ti.

"A taksa len zawng te, a tharum ngah zia te, tlarhnung tawp bera a khelh thiam dan leh tlarhnung hnung lama tlan luh zung zung a thiam dante ang hi player dangah hmuh tur an tam lo. Hlauhawm tak a ni chiang mai. A fitness a neih let theih nana hna a thawh hnuah, hetiang dinhmun sanga a rawn inlan leh thei hi a ropui hle a. Goal hnih a khung tawh a, a che ṭha a, khelmualah minute ṭha tak a hmang bawk a, a hmasawn danah hian ka lawm takzet a ni," tiin a sawi zui.

He inkhelah hian Bryan Mbeumo chuan goal khung lo mah se, Premier League match hmasa pahnihah khan goal a lo thun tawh a; Matheus Cunha pawhin Champions League-a a goal hmasaber a khung bawk. Carrick chuan tun dinhmunah tlarhma player thlan chu thutlukna siam harsa tak a nih thu a pawm a ni.

"Thutlukna siam a awlsam lo khawp mai. Awlsam lo mah se, team-in goal a khung a, mual chhunga kan naute an khelh ṭhat miau chuan hetiang dinhmun hi ka duh zawk fe a ni," tiin Carrick chuan a sawi. "An zavai hian ngaihdan inang an nei a, a changin bul an ṭan ang a, a changin match titawptu an ni ang. Season tluanin group chhungah hetiang rilru hi kan mamawh reng dawn a ni. Vawi tam tak ka lo sawi tawh a, ka sawi nawn leh ang; hun hrang hrangah theihna danglam tak tak chhawr theih tur kan nei hi thil lawmawm a ni a. An form a ṭhain bul an ṭan ṭha hlawm em em hi a ropui takzet a ni," tiin a sawi bawk.