Kum thum hnuah a vawikhat nan Manchester United chu Champions League-ah an inlan leh ta a, Old Trafford-ah Azerbaijan champion Sabah FK chu 4-0 ngawtin an sawp nghal a ni.

He hnehna ropui tak hian United chu Europe inelna sang berah bul ṭan ṭha tak a neihpui a, goalkeeper Senne Lammens pawhin tun season-a a clean sheet hmasaber a nei bawk.

2026/27 season-a a vawikhat nan bul ṭantu striker Benjamin Sesko chuan he zan hi United tan chuan zan "ṭha famkim" a nih thu a sawi a. Sesko hian Michael Carrick-a'n amaha rinna a nghah chu goal khungin a rul nghal a ni.

Match zawhah TNT Sports nena an inbiaknaah United head coach Michael Carrick chuan an chet danah thil ṭha hmuh tur tam tak a awm thu a sawi a. Clean sheet an neih theih bakah point thum an hmuh dan leh khelmuala an inkhelh dan chu a fak hle. A bikin ball an chhuhsak hnua rang taka tlarhma lam an nawr nghal dan (transition)-ah team hlauhawm tak an nih zia a tarlang.

Carrick chuan, "Clean sheet neih a, match-a hnehna chan hi thil lawmawm tak a ni. Kan football khelh ṭhenkhat kha a ṭha takzet a, transition-ah pawh kan hlauhawm hle a ni. Sabah lam pawh fak an phu hle; an laka khelh kha a harsa ve tlat a ni. Result lam en mai chuan awlsam taka chak kan ang maithei a, mahse a tir aṭanga a tawp thlengin a awlsam reng bik lo. Zanin hian thil ṭha tam tak kan ti a, chu chuan result ṭha min pe ta a ni," tiin a sawi.

Kar tawpa Everton laka a khelh ṭhat hnuah, he match-ah pawh hian midfield-ah Kobbie Mainoo chu a che ṭha leh hle a. Mainoo chungchang an zawhna chu chhangin Carrick chuan, "Player ropui tak a ni a, chu chu khelmualah a lang chiang reng a ni. Kan inkhelhah hian nghawng lian tak a nei reng bawk. Team-a a awm hi a lawmawm em em a; hmasawn a duh a, thu ngaihthlak a inhuam bawk a, hei hi hmuh a nuam hle a ni," a ti bawk.

Tlarhnung veilamah Patrick Dorgu chu a inlan ṭha hle bawk a, Luke Shaw nena left-back dinhmun an inchuhna chu a nung chho hle dawn niin a lang.

Sabah laka 4-0 a an chak hi Michael Carrick-a tana manager anga Champions League match a hmachhawn vawi hnihna chauh a la ni a. November 2021 khan interim manager niin Villarreal chu 2-0 in a lo hneh tawh a, tun thleng hian Champions League-ah tlawm lovin a la kal tluan par par a ni. United hian Metropolitano Stadium-ah Atletico Madrid an tlawh dawn a, Carrick hian Champions League-a record ṭha famkim a neih mek chu humhim a tum chhunzawm ang.