Pathiannia Everton tlawha khualmuala an zin hmain, Nilaini khan Manchester United academy player pahnih JJ Gabriel leh Harry Amass te chuan senior first-team training session an zawm ve a ni.

Transfer deadline a liam hnuah hetianga rawlthar te first-team-a an tel theihna hunṭha hi a rawn inhawng a. Hill Dickinson Stadium-a Everton laka inkhel tur atana Michael Carrick-a'n player chhawr theih a neih angte a thlithlai mek laiin, heng academy tlangvalte hian an theihna an pholang ve mek bawk a ni.

Sky Sports reporter Danyal Khan-a'n X (Twitter)-a a tarlan danin, an open training neihah khan winger Amad chu a inlan ve lo a; Mason Mount, Benjamin Sesko, Gabriel leh Amass te erawh group-ah an tel thung. Khan hian centre-back Matthijs de Ligt chu zai (operation) a nih hnu damkawr la ni mekin a taksa indaihlohna enkawl (load managed) a nih avangin training-ah a tel rih lo tih a tarlang tel bawk a ni.

Training-a a inhliam avangin Amad hi chawlhkar ruk (6) vel chhung khelmual a chhuahsan a ngai dawn nia hriat a ni a. Hetih lai hian Mason Mount-a'n training a zawm leh theih tak erawh chuan Everton hmachhawn tur Manchester United tlar laili tan chhawk zangkhaina lian tak a thlen dawn a ni. Thil awmdan aṭanga thlirin, Mount hi Pathianni match-ah matchday squad-ah a tel theih ngei beiseina a lian hle.

Kum 19 mi defender Harry Amass hi transfer deadline day khan EFL club eng emaw zatin an ngaihven avangin chhuak teuh hle mah se, United hian left-back thar an lakluh tak loh avangin Old Trafford-ah hian a cham zui ta a ni. A tirah chuan tun season chhung hian Under-21 team lamah inlan deuh ber tura ngaih a ni a. Mahse Carrick-a'n tlarhnung veilamah chhawr theih a neih tlem avangin, beisei aia hmain Amass hi an mamawh a ngai thut thei a, Everton hmachhawn hmaa first-team training-a a inlan hian chutiang kawng chu a hawng ṭan a ni.

Kum 15 mi forward JJ Gabriel pawhin United Under-21 tan bul a ṭan ṭha hle a. Match hnih a khelh chhungin goal hnih khungin assist vawi hnih a nei tawh a ni. Academy huang chhunga a khelh chhunzawm zel laiin, senior team training-a a rawn inhlangkai chho hi he rawlthar career-ah hmasawnna pawimawh tak a tling a ni.

Pathiannia Everton mual an pan hunah hian Gabriel leh Amass te tan senior debut siam nan a hma deuh mai thei a, mahse hetianga inbuatsaihnaa an tel ve theihna hian Carrick-a ngaihven an hlawh chho hle tih a tilang. Hei bakah hian kar thara United-in Sabah laka Champions League campaign an ṭan hunah chuan matchday squad-ah heng rawlthar pahnihte hi telh theih tura chhawp an nih theihna a sang hle bawk a ni.