Kumin nipui World Cup-ah khan England tan khelmualah hun a chang lo a, hei hian Kobbie Mainoo-a hmasawnna a titawp ang tih hlauhna awm chu kar liam taa a khelh dan aṭang khan a reh chiang hle a. Manchester United head coach Michael Carrick chuan tun season-a hma sawn zel a duhna leh a rilru puthmang avangin he rawlthar hi a fak hle a ni.

Kum 21 mi Mainoo hi season liam ta chanve hnihna, January thla aṭang khan first-team-ah rawn inlan ṭanin United tan a che ṭha chho hle a. A theihna a phochhuah ṭhat em avangin England World Cup squad-a mi 26 hruai zingah a inzeh lut hial a nih kha. Mahse North America-ah khan Thomas Tuchel chuan Manchester United manager hlui Ruben Amorim-a'n a lo hlamchhiah ṭhin ang chiahin a ngaihthah ve leh a, match 8 an khelh chhung zawng khan minute khat pawh khelmual a rah ve hman lo a ni.

Pre-season chawlhkar tawp lamah a naupan tet aṭanga a lo ṭan tawh United hi zawm lehin, kar liam taa Ipswich lakah tun season-a a vawi khat nan bul a ṭan a, Carrick-a hnuaia a khelh tawh zawng zawnga a khelh ṭhat ber ṭum a rawn phawrh chhuak nghal a ni.

He hmasawnna hi Mainoo-a inpekna leh zirlai anga thil zir zel a duhna aṭanga rawn chhuak a nih thu sawiin Carrick chuan, "Kobbie hian season liam ta tawp lamah khan hma a sawn nasa hle a, kar liam ta khan a khel ṭha leh em em bawk a ni. A theihna leh a khelh dan hrang hrang a tihhmasawn zia chu hmuh theihin a lang chiang hle. Zir a duh a, thil thar hriat a tuihal reng a, a aia tam neih zel a tum a, hei hi thil ropui tak a ni.

"Ka enkawl ṭan aṭanga thla 8 chhung khan hun ṭha tak a hmang a. A tan chuan, 'A ṭha tawk e, team-ah ka awm a, match tam tak ka khel a, engkim a ṭha vek e,' tia ngaih mai chu a awlsam hle ang. Mahse chutiang rilru pu lovin hma sawn zel a tum a, chutianga a ti chu a dik reng bawk a ni," tiin a sawi.

Hetiang rilru puthmang hi tun season-ah hian Mainoo tan a pawimawh lehzual dawn a ni, a chhan chu a hma aia inelna sang zawk a hmachhawn dawn vang a ni. Kumin nipui chhung khan United chuan midfielder thar pathum - Carlos Baleba, Andrey Santos leh Youri Tielemans te lakluh nan £155million lai an seng a, heng player tharte hian bul ṭan ngei an tum ṭheuh dawn a ni.

Inelna awm chungchang sawiin Carrick chuan, "Inelna awm hi thil ṭha tak a ni. Player pakhat leh midang inelna satliah nilovin, squad chak tak kan nei tih hriatna a ni zawk. Inelna ṭha kan neih hian kan inzir tawn thei a, kan inṭanpui tawn thei a, kan midfield group hi a chak tawk hle a ni," a ti.

Player lak luh thar pathumte bakah pre-season-a che ṭha tak, hliam vanga thla khat chawl ta Mason Mount te tan harsatna awm chu, Mainoo hian midfield lailiah hmun nghet a chang nghal der tawh hi a ni. Kar liam ta khan tlarhnung hnaih lam (deeper role) ah a khel a, tlarhnung venhim lama a tlin tawk loh nia Amorim-a'n a lo ngaih ṭhin chu a dik lo tih a nemnghet a ni.

Carrick chuan sawi chhunzawmin, "Kobbie hian season ṭha tak a hmang leh thei ngei ang tih a chiang. A rawn kir leh dan a ropui hle a, kar tawpa kan inkhelh ṭum pawh khan a lang chiang a ni. Training-ah leh team boruakah pawh a puitlin chhoh zia a hriat theih a, a la naupang hle chungin a puitling tawh hle. A theihna la phawrh chhuah tur tam tak a la nei a ni.

"A ṭhatna ber chu zirtir a ngaihthlak thiam hi a ni a, zirtirna kan pek apiang hi uluk takin a dawngsawng a, a zir chhuak ṭhin. Hei hian a theihna sang tak phawrh chhuak vek turin hun ṭha a pe dawn a ni," tiin a fak zui bawk.