Pathianni tlai hian Manchester United chuan Everton chu an khelmual Hill Dickinson Stadium-ah an luhchhuah dawn a. He khualmual inkhel hi February thlaa Michael Carrick-a'n United manager a nih hnua Everton a tlawh hmasak ber ṭum ai khan hna awlsam zawk a nih a rinawm hle.

Khami ṭum khan striker Benjamin Sesko-a goal khung leh goalkeeper Senne Lammens-a chet ṭhat zarah United hian 1-0 in hnehna an lo chang tawh a nih kha. Mahse tun dinhmunah chuan United chu team dang daih an ni tawh a, tumpui Everton pawh thla sarih liam taa an hlauhawm ang kha an ni tawh bik lo a ni.

Everton tlahniam ta tlat chhan lian ber chu David Moyes-a naute hian an player pawimawh ber Iliman Ndiaye chu £65m sengin Manchester City hnenah an hralh a, a hmunruak luah thei tur player ṭha an lalut lo a ni. Ndiaye hi kum liam ta chhung zawnga Everton tana hlauhawm ber leh match thunun theitu awmchhun a ni a; a aiawhtu tura ngaih Jack Grealish erawh chuan goal khung leh assist neih kawngah hlauhawmna a thlen tawk lo hle.

He thil hian Everton tana chakna thlentu awmchhun a laksak a, Barry, Tyrique George leh Kiernan Dewsbury-Hall te chauh an kawl tawh a; hei hi tun season-a United tlarhnung la nghet tawk lo tan pawh hmachhawn awlsam tak a ni ang. Beto chuan Fiorentina a pan a, transfer deadline niah Everton hian Folarin Balogun lakluh an tumna a hlawhtling lo a, United lahin Joshua Zirkzee an dilna chu an lo hnawlsak bawk nen, Everton ṭantute rilru a hah hle a ni.

Everton tana hlauhawm ber James Tarkowski chu set-piece aṭangin hlauhawm reng mah se, thil lawmawm pakhat a awm ve thung. Season liam taa corner aṭanga goalkeeper Senne Lammens-a an lo nawr beh (wrestle) ṭhin dan ang kha Premier League-ah dan thar avangin hman phal a ni tawh lo a ni. Arsenal pawhin an corner lak dan thlak a ngai hial a, box chhunga tharum nena inpalzut an khap tak tlat avang hian Everton-in United an lo tihbuai ve theihna hriamhrei awmchhun chu an chan ta a ni.

Kar hnih liam ta khan Hull City lakah United tlarhnung hi set-piece aṭangin an lo buai tawh a, mahse he dan thar leh Ndiaye awm tawh loh hian Carrick-a naute tan hahdam takin khelmual an chhuahsan theihna kawng a hawng a ni. Carrick chuan David Moyes-a dinhmun tiderthawng zual tura hnehna ropui tak lak a inbeisei ngei ang.

Heng thil thleng avang hian Hill Dickinson Stadium boruak chu Pathianni tlai hian a chhe hle dawn tih a chiang a. Transfer bazar an khar dan chhiat em avangin fan-te chuan club board, recruitment team leh David Moyes lakah an thinurna an lantir nasa hle a, inkhelh hmain lungawi lohna lantirna (protest) hial neih an tum a ni. United hian khelmualah bul ṭan ṭhain goal hma an khung thei a nih chuan, he Everton fan-te thinurna hi chhawr ṭangkaiin Carrick-a'n a duh ang thlapin inkhel a her danglam thei ang.