Champions League inelnaa Manchester United an kir lehna match-ah Sabah chu 4-0 ngawta an sawp hnuin, head coach Michael Carrick chuan khelmuala che ṭha tak midfielder Kobbie Mainoo chu a fak hle a, an midfield thar inthlak danglam dan chungchang a sawifiah bawk.

United-in ropui taka Champions League an khelh leh ṭum hian, Mainoo hi match hnih a zawnin khelmuala player langsar berte zinga mi a ni a, tlar lailiah themthiam takin ball a khawih kual a ni. Head coach hlui Ruben Amorim-a hnuaiah khan club chhuahsan mai tur dinhmuna ding anga ngaih tawh ni mah se, tunah chuan Carrick-a hnuaiah United player pawimawh berte zinga mi a rawn ni chho leh ta a; Sabah laka an hnehna chan hnu hian Carrick chuan he midfielder theihna leh a nungchang ṭha chu a fak mawlh mawlh a ni.

Carrick chuan Mainoo chungchang sawiin, "Kobbie hi player ropui tak a ni. A khelh dan aṭang hian a chiang reng a, tlarhnung deuh hret aṭanga khelin attack a zawmkhawm a, attack a ṭan bawk a ni. Kan inkhelhah hian nghawng lian tak a nei mek a ni.

"Kawl a nuam em em a, thil zir a duh a, hmasawn a duh bawk a, thu ngaihthlak a hreh lo va, khelmualah zalen takin a theihna a pholang bawk a, hmuh a nuam takzet a ni," tiin a sawi.

Thla tlemte liam ta chhung khan United midfield hian inthlakthlengna lian tak a hmachhawn a, nipui transfer bazar chhung khan Old Trafford club chuan tlar laili thuamṭhat nan Andrey Santos, Youri Tielemans leh Carlos Baleba te chu an lalut thar a nih kha.

Brighton aṭanga an lakluh Baleba chu hliam avangin United tan a la inlan thei rih lo a, mahse Ningani zan inkhelah khan Santos leh Tielemans te chuan an theihna an pholang ve ve a, a bikin Belgian midfielder Tielemans chuan mual laili chu a thunun hneh hle a ni. Carrick-a hnenah hian United midfield thar chu muangchangin a kalhmang a fuh chho ṭan em tih zawh a ni a, midfield-a danglamna a rawn thlen tum dan chu sawifiah tura ngen a ni bawk.

Carrick chuan, "Player ṭha tak tak kan nei a, chu chuan min pui hle a ni! Second half-ah Andrey [Santos] leh Mason [Mount] te kan luhtir thei a, khelh dan ngai reng kha an rawn chhunzawm thei kha a lawmawm hle," a ti.

Sawi chhunzawmin Carrick chuan, "Inzawmna (connections) leh combinations siam a, ball chang chunga a changa inhnaih taka in-pass kual vel te kan kalpui a ni. Mual lailiah ball chang a, thunun theihna technical ability ṭha tak kan nei a. Chu tak chu an thiam zawng leh an theihna a nih avangin, an theihna sang lai tak hmang chuan kan khelhtir mek a ni," tiin an tactical kalphung thar chu a hrilhfiah zui bawk a ni.