Manchester United-in kumin nipuia lakluh an tum, Atalanta midfielder Ederson chuan Brazilian national team-a a tel theih lohna chhan a hliam chu hliam tenau mai a nih thu sawiin, United-in amah lak an tumna an ṭhulh leh tak chhan leh a medical chungchang chu a sawifiah.

Contract hmang zo tawh Casemiro-a thlaktu atan United hian kum 27 mi Ederson hi £35m sengin lakluh an lo inrempui fel hman tawh a ni. Mahse, medical examination an neih ṭumin United chuan a khupah hliam lian tham tak a nei tih an hmuhchhuah tak avangin he inremna hi an tihtawpsak ta a nih kha. Head coach Michael Carrick-a naute hian Ederson-a aiah Youri Tielemans, Andrey Santos leh Carlos Baleba te chu an la zui ta zawk a, Ederson erawh chuan Atalanta-ah kum 2031 nipui thleng daih tur contract thar a ziak ta zawk a ni.

Kumin nipuia a dinhmun tibuaitu hliam chungchang sawiin Ederson chuan, "Ka ṭha lutuk, a hma ang bawkin ka la pangngai reng. Taksa lamah chuan vui tur ka nei lo. He lamah hi chuan ka vannei em em reng a, ka ṭha reng a ni," tiin Trivela a hrilh.

A sawi zawmnaah he Brazilian midfielder chuan, "Ram tana min kohna tibuaitu ka hliamte kha chu hliam tenau tak mai a ni a. Ni tlemte chhung chauh min chawlhtir a, kohna chhuah dawn hnaiha a lo thleng kher kha ka vanneih loh vang a ni mai. Chuvang chuan rang takin ka kir leh vat zel a, hun rei tak chhung min chawlhtir thei tur hliam engmah ka la tawk ngai lo," tiin a sawi.

Ederson hian inelna neih laia a fitness hloh takte neih let leh tumin Serie A club hi a hma lamin a zawm leh thu leh, eng buaina mah tawk lovin a inbuatsaih theih thu a sawi bawk. "Buaina engmah nei lovin inbuatsaihna zawng zawng ka nei a, test zawng zawng pawh ka paltlang vek a, ka tih ṭhin dan pangngaiin season ka ṭan leh a ni. Tun season chhunzawm zel tur hian ka ṭha tawk hle a, Atalanta pawhin min hrechiang em em a ni," a ti.

Ederson hi Atalanta captain thar a ni zui a, tun season-ah an match khelh tawh pali-ah bul a ṭan vek tawh bawk. Club nena inlaichinna ṭha tak an neih thu sawi nawnin, "Club hotute hi ka be ngun hle a, hetah hian inlaichinna ṭha tak kan nei a ni. Club dang aṭanga zawhna leh dawrna a awm apiangin Atalanta thiltum leh ruahmanna te, min hralh an tum leh tum loh te ka zawt ṭhin a, anni chuan min hralh an tum ngai miah lo," tiin a sawi.

Kumin nipui chhung hian United a pan theih loh chungchang Ederson-a'n a sawichhuah vawihnihna a ni ta a ni. Thla liam taa Europa Conference League play-off match-a Hapoel Tel Aviv an hmachhawn hma pawh khan a lo sawichhuak tawh a. Khatih ṭum khan, "A nihna takah chuan eng thil chiah nge thleng tih ka hre bik lo. Club dang ngaihvenna ka dawng reng ṭhin a, England club dang pawh ka pan thei reng a ni. Test te kha chu ṭha takin a kal vek a, eng thilin nge thlak danglam ta tih ka hre lo a ni. Atalanta-ah hian kum li ka awm tawh a, ka khel ziah bawk. Thil thleng tur nghah mai pawh a theih a, mahse club nena kan inlaichinna ṭhat em avangin cham zui a contract thar ziah kha ka thlang ta a ni," tiin a lo sawi tawh a ni.