Manchester United neitu thar INEOS chuan first-team player hralh chhuah kawngah harsatna an tawh nual avangin, kumin nipui chhung khan an academy chhuak player eng emaw zat an chhuahtir ta zawk a.

Toby Collyer, Louis Jackson, James Overy, James Scanlon leh Habeeb Ogunneye te chu hralh chhuah an ni a, heng zinga ṭhenkhat hi chu chhuah awm reng pawh an ni. Mahse kar thum pawh la tling lova a professional contract hmasaber a ziah hnu lawka Louie Bradbury an chhuahtir leh mai erawh mi tam tak tan thil mak a tling a ni.

Kum 17 mi, Wales Under-19 international hi season liam ta khan a che ṭha hle a, kum 16 mi lek la ni chungin inelna hrang hrangah goal 10 lai a khung a, Under-21 tan pawh vawi hnih a khung hman a ni. Tun season inṭan hlimah pawh Darren Fletcher-a enkawl Under-18 team tan Everton an hneh ṭum khan goal a lo khung tawh bawk a ni.

Mahse Stoke City lamin first team-a inlan theihna kawng chiang zawk an kawhhmuh tak avangin, league title vawi 20 la tawh Manchester United hi kalsanin a thawkchhuak ta zawk a ni.

United-in a chhuah thu an nemngheh hnu ni khat lekah, Bradbury hian Stoke City Under-18 tan a match hmasaber a khel nghal a. Manchester City Under-18 nena an inhmachhawnna inkhel hmuhnawm takah hat-trick a rawn siam nghal a ni. He inkhelah hian goal 13 lai lutin City hian 8-5 in hnehna an chang a, inkhelh chhung hian player pathumin hat-trick an siam hial a ni.

Stoke academy director Jack Higgins chuan, "Louie kan club-a kan lalut thei hi kan hlim hle a, Under-18 leh Under-21 huanga striker phurawm tak tak kan neih sa te a rawn belhchhah dawn a ni. Manchester United-a kum engemaw zat tawn hriat ṭha tak tak a lo neih tawh hnuah, kan kiangah a theihna chherchhuak chhunzawm zel turin kum ṭha tak a nih laia min rawn zawm hi a lawmawm hle," tiin a sawi.

A debut match-a a theihna a phochhuah nghal em avang hian Stoke senior team manager Mark Robins-a mit a la ngei ang a, Championship inelnaah pawh a inlan thuai theih a rinawm hle.

A inleina sum zat puanzar ni lo mah se, he striker naupang hian bet365 Stadium-ah theihna sang tak a phochhuak zui zel a nih chuan United tan hamṭhatna a awm theih nan buy-back clause leh sell-on clause ṭha tak an dah tel beisei a ni.

United hian kumin nipui chhung hian an striker theihna ngah tak pahnih Chido Obi leh Ethan Wheatley te pawh loan-in an chhuah tir bawk a, first team tana inpeih sa taka an lo kir leh theih INEOS chuan an beisei hle a ni.