Manchester United chuan tun 2026/27 season bul ṭan tirhah winger Amad Diallo leh nipui bazar-a £65m senga an lakluh thar midfielder Carlos Baleba te chu hliam avangin an la chhawr thei lo a. Mahse head coach Michael Carrick chuan khelmualah an pahnih hian an inlan leh thuai theih a beisei chho mek a ni.

Pre-season chhung khan Amad hi a khel ṭha hle a, mahse Hull City laka tun season match hmasaber an khelh hma chiah khan a thahrui (muscle) a tihliam hlauh mai a ni. 5-2 a Ipswich an hneh hmaa Carrick-a'n Amad-a dinhmun a sawi hnuhnung berah khan, he winger hi khelmual chhungah a la inlan thei rih dawn lo tih sawiin "a la chawl rei deuh rih ang" tiin a lo sawi tawh a ni.

Chutih laiin Brighton aṭanga an lakluh kum 22 mi Baleba erawh pre-season lai khan a kerekah hliam a tawk a, mahse United hian he Cameroon international hi lalut tlangin inremna an siampui ta tho a ni. A tirah chuan chawlhkar hnih aṭanga thum vel chawl tura ngaih a ni a. Tunah hian United chuan match hmachhawn tur zut mai an nei chho mek a, The Standard chuan heng player-te hliam dinhmun thar hi an tarlang a ni.

Ningani zan hian Champions League group phase match riat an khelh tur zinga a hmasaber atan Old Trafford-ah Sabah an mikhual dawn a, he inkhel erawh Amad-a tan a la hma mah mah nia ngaih a ni. Amaherawhchu, Pathianni tlai-a Manchester derby nghahhlelhawm taka Manchester City an hmachhawn hunah erawh squad-a tel hman ngei tumin Amad hian theih tawp a chhuah mek a ni.

Baleba chungchangah thung erawh chuan, The Standard tarlan danin Premier League-a Tottenham an tum hun tur October ni 10 hi a khelmual luh theih hun tura ngaih a ni ta zawk a. International break hmain khelmualah rawn inlan thei tho mah se, United hotute hian an midfielder lak thar hi hmanhmawh lutuka khelmuala luhtir an tum lo a ni.

Hemi rual hian tlarhnung lama United harsatna phuhruk turin Matthijs de Ligt pawh a rawn kir leh thuai tawh dawn a ni. Dutch defender hi a hnungzang hliam (back injury) enkawl a ngaih avangin November thla aṭang khan inelna tak takah a la inlan miah lo a. De Ligt hi United training-ah a kir leh tawh a, first-team-a khel leh thei turin a inpeih chho mek a ni.

Tun season match thum an khelh tawhah United tlarhnung venhimna chu sawisel a tawk nasa hle a, Carrick-a naute hian game tina goal hnih zel chhuahin an buai ṭhin a ni. Chuvang chuan De Ligt-a lo let leh tur hi United tan chuan chanchin lawmawm tak a ni a. He Dutch defender hi tun thla chhung ngei hian rawn inlan leh tura beisei a ni a, Sabah hmachhawn tur squad-ah pawh hian a tel thut thei hial a ni.