UEFA Champions League-a an kir lehna match hmasa berah Manchester United chuan Old Trafford-ah chet ṭhatna ropui tak pholangin, inelnaa vawikhat nan rawn inlan Azerbaijan club Sabah FK chu 4-0 ngawta sawpin 2026-27 campaign bul an ṭan ṭha hle.

Michael Carrick-a naute hian match chhung zawng deuhthaw inkhel an thunun hneh hle a, mualneitu lamin tumpuite lakah beiseina engmah an siamsak lo a ni. He inkhelah hian United captain Bruno Fernandes chu a theihna sang ber nena rawn inlanin, mual laili aṭangin danglamna lian tak a rawn thlen zui nghal bawk.

Old Trafford mualpuia inkhel hmuhnawm takah hian United tan tlarhmaa inkawp Matheus Cunha, Bruno Fernandes, Benjamin Sesko leh defender Lisandro Martinez te chuan goal an khung a, mualneitu lam tan hnehna nuamsa tak an thlenpui a ni.

He inkhela United star Fernandes-a chet dan hi a langsar zual bik hle a. Portuguese midfielder hian inkhelh chhung zawngin chance vawi li (4 chances created) lai a siam bakah, khingpuite hnen aṭangin ball vawi li a chhuhsak (4 recoveries) a, goal zawnah vawi thum shot neiin goal khat a khung bawk a ni. A theihna leh a thawhrimna hian khingpuite tlarhnung a tibuai hneh hle a, tumpuite tan dan ngaihna a awm meuh lo.

Season liam taa Europe inelna sang bera inlan thei lo Manchester United tan chuan he hnehna hi chanchin lawmawm tak a ni a. Head coach Michael Carrick-a enkawlna hnuaiah Champions League league phase bul ṭan nan point thum hlu tak an hmu nghal a, si phurh nei lovin Old Trafford-ah lawmna ropui tak an nei zui ta a ni.